जनकपुरधाम,१० असोज। धनुषामा तीनजना किशोर सवार मोटरसाइकल दुर्घटनामा दुईजनाको मृत्यु भएको प्रहरीले जनाएको छ।
गएराति कमला नगरपालिका–२ स्थित खोक्साहा पुल नजिक नम्बर नखुलेको मोटरसाइकल दुर्घटना हुँदा दुई किशोरको मृत्यु हुनुको साथै दुर्घटनामा परेर अर्का एक किशोर गम्भीर घाइते भएका छन्।
जिल्ला प्रहरी कार्यालय धनुषाका अनुसार मृत्यु हुनेमा धनुषाकै जनकनन्दिनी गाउँपालिका– ५ बनरझुलाकम १८ वर्षीय अमित यादव र १६ वर्षीय कुश मिश्र रहेका छन्।
दुर्घटनामा दुवै किशोरको घटनास्थलमै मृत्यु भएको प्रहरीले जनाएको छ।
मोटसाइकलको पछाडि सवार सोही ठाउँका १७ वर्षीय राहुल महतो गम्भीर घाइते भएका उनको जनकपुर प्रादेशिक अस्पतालमा उपचार भइरहेको प्रहरीले बताएको छ।
दुर्घटना बिहीबार राति साढे १० बजेतिर भएको थियो।
कमला नगरपालिका–३ लगमा बजारमा आयोजन हुँदै आएको झिझिया नाच हेर्नका जाँदै गरेका किशोर दुर्घटनामा परेका हुन्। तीव्र गतिको कारण दुर्घटना भएको अनुमान प्रहरीले गरेको छ।
दुर्घटना विषयमा थप अनुसन्धान जारी रहेको प्रहरीले बताएको छ।
