दमक,१३ असोज। वडादसैं अर्थात् नवरात्रको आठौं दिन सोमबार दसैं घर वा पूजा कोठामा नौ दुर्गामध्येकी सातौं कालरात्रि देवीको विधिपूर्वक पूजा आराधना देशभर गरिँदैछ।
प्रत्येक वर्ष आश्विन शुक्ल सप्तमी अर्थात् दुर्गा पक्षको सातौं दिन कालरात्रि देवीको विधिपूर्वक पूजा आराधना गर्ने वैदिक सनातनी परम्परा रहेपनि यस वर्ष चौथी तिथि वृद्धि भई आठौं दिनमा पुगेको नेपाल पञ्चांग निर्णायक विकास समितिले बताएको छ।
प्राणीमात्रलाई कालले नष्ट गर्दछ भन्ने परम्परा मान्यता छ। त्यस्तो काललाई पनि भगवती देवीले नष्ट गरिदिनु हुन्छ भन्ने मान्यता पाइन्छ । यस्ती देवीको स्वरुपलाई कालरात्रि भनिन्छ। कालरात्रि कृष्ण वर्णको हुनुका साथै उहाँ भयंकर आकृतिको हुनुन्छ भन्ने विभिन्न पुराणमा उल्लेख छ। प्राणीलाई नष्ट गर्ने भएकैले यी देवीलाई कालरात्रि भनिएको शास्त्रमा पाइन्छ ।
नवरात्रको पहिलो दिन असोज ६ गते सोमबार दसैं घर वा पूजा कोठामा वैदिक विधिपूर्वक घटस्थापना गरी जौको जमरा राखिएको थियो भने त्यसै दिन घटस्थापना गरिएको स्थानमा नौ दुर्गामध्येकी पहिलो देवी शैलपुत्रीको आह्वान गरी विधिपूर्वक पूजा आराधना गरिएको पाइन्छ ।
दोस्रो दिन मंगलबार पूजास्थलमा ब्रह्मचारिणी देवीलाई आह्वान गरी विधिपूर्वक पूजा आराधना गरिएको थियो भने तेस्रो दिन बुधबार चन्द्रघण्टा देवीको निष्ठाका साथ पूजा आराधना गरियो भने चौंथो दिन बिहीबार र पाँचौ दिन शुक्रबार सूर्योदय कालमा चौथी तिथि रहेकाले दुवै दिन कुष्माण्डा देवीको विधिपूर्वक पूजा आराधना गरिएको थियो। चौथी तिथि वृद्धि भएकाले यस वर्षको नवरात्र दशरात्र बनेको छ। छैटौ दिन शनिबार स्कन्दमाता र सातौं दिन आइतबार कात्यायनी देवीको पूजा आराधना गरिएको थियो।
आठौं दिन आज (सोमबार) कालरात्रि देवीको विधिपूर्वक पूजा आराधना गरिँदै छ। नवरात्रका नौ दिन घटस्थापना गरिएको स्थलमा दुर्गा सप्तशती (चण्डी), श्रीमदेवीभागवतलगायत देवी स्तोत्र पाठसमेत गरिन्छ। नवरात्रका अवसरमा देवीको आराधना गरी पूजा गरेमा शक्ति, ऐश्वर्य र विद्या प्राप्त हुने धार्मिक विश्वास रहँदै आएको छ। नौ दिनसम्म पूजा आराधना गरेको प्रसाद विजयादशमी देखि कोजाग्रत पूर्णिमाका दिनसम्म लगाइन्छ। यसरी १५ दिनसम्म नेपालीले बडा दसैं पर्व मनाउँने गर्दछन्।
आश्विन शुक्ल सप्तमीका दिन आज(सोमबार) पूजा कोठा वा दसैं घरमा फूलपाती पनि भित्र्याइँदै छ। फूलपाती अपराह्न भित्र्याउने वैदिक विधि रहेको छ। फूलपाती भित्र्याउन साइत नचाहिने समितिका सदस्य प्रा. डा. देवमणि भट्टराईले जानकारी दिनु भयो।
