दमक, असोज १४ | झापा जिल्लाको शिवसताक्षी नगरपालिका–५ मा आज एक पुरुष मृत अवस्थामा फेला परेका छन्।
इलाका प्रहरी कार्यालय झिलझिलेका अनुसार माईखोलाको बीच भागमा अन्दाजी ५५ देखि ६० वर्ष उमेरका अज्ञात पुरुष पानीमा घोप्टो परेको अवस्थामा स्थानीयले देखेका थिए। उनीहरूकै सहयोगमा शवलाई करिब १०० मिटर पूर्वतर्फ निकालेर सुरक्षित राखिएको थियो।
घटनास्थलमा प्रहरी निरीक्षकसहितको टोली खटिएको थियो। दिउँसो १ बजे सम्पूर्ण कानुनी प्रक्रिया पूरा गरी शवलाई पोष्टमार्टमका लागि प्रादेशिक अस्पताल भद्रपुर पठाइएको प्रहरीले जनाएको छ।
तर, साँझ ४:३० बजे प्रादेशिक अस्पतालमा शव राख्ने ठाउँ नभएको कारण, उक्त शवलाई मोरङको मदन भण्डारी ट्रमा अस्पताल, मंगलबारेमा स्थानान्तरण गरिएको छ।
प्रहरीले घटनाबारे थप अनुसन्धान जारी राखेको जनाएको छ।
तस्बिर : ए आई
