दमक, १७ असोज । बडादशैं २०८२ को पावन अवसरमा उज्यालो खबर परिवारको तर्फबाट हाम्रा आदरणीय पाठक, बिज्ञापनदाता , दर्शक तथा श्रोता सबैमा हार्दिक मंगलमय शुभकामना व्यक्त गर्दछौँ ।
तर यो वर्षको दशैं हामीले विगतका जस्तै उमंग र उल्लासका साथ मनाउन सकिरहेका छैनौं। देश अहिले अत्यन्तै संवेदनशील मोडमा पुगेको छ। हालसालैको जेन जि आन्दोलनले देखाएको असन्तोष, दलहरूको निष्क्रियता, सदनको विघटन, सडकबाट बनेको अन्तरिम सरकार, अनि संविधानमै प्रश्न उठाउने धम्की—यी सबैले हाम्रो भविष्य प्रति गहिरो चिन्ता थपेका छन्।
यता विभिन्न समूहले घोषणा गरेका आन्दोलन र चेतावनी, उता आन्दोलनको प्रतिकारमा उत्रिने भनिएका शक्तिहरू। यस्तो अवस्था बढ्दै गए देश फेरि हिंसा, तोडफोड र रक्तपातको दलदलमा नफस्ला भन्ने ग्यारेन्टी छैन। यो दशैंमा हाम्रो मनमा एक मात्र प्रश्न उब्जिएको छ—के हामी अझै पनि संवाद, सहकार्य र आपसी समझदारीबाट समस्याको समाधान खोज्न सक्दैनौं?
हामीले अनुभव गरेका पीडा, देखेका विभाजन, सुनेका धम्कीबीच पनि आशा भने बाँकी छ। दुर्गा माताले हामीलाई सहिष्णुता, संयम र सहकार्यको शक्ति प्रदान गरुन्। यो दशैं हाम्रा लागि केवल चाड मात्र नभई राष्ट्रिय एकता र राष्ट्रियताको रक्षा गर्ने आत्मबलको क्षण बनोस्।
देश रह्यो भने मात्र हामी रहन्छौं। हामी रह्यौं भने मात्र राष्ट्रियता रहन्छ। यस दशैंले हाम्रा हृदयमा सकारात्मक भावना, सहअस्तित्व र चिन्तनशीलता जगाओस् भन्ने हार्दिक प्रार्थना गर्दछौँ ।
हामी उज्यालो खबर परिवारका तर्फबाट सबै पाठक, विज्ञापनदाता र शुभचिन्तकप्रति गहिरो कृतज्ञता व्यक्त गर्दै, सम्पूर्णमा सुख, शान्ति र समृद्धिको शुभकामना अर्पण गर्दछौं।
