दमक, १८ असोज | झापा जिल्ला प्रशासन कार्यालयले बाढी र डुवानको उच्च जोखिमलाई मध्यनजर गर्दै मेची, बिरीङ, कन्काई लगायतका नदी–खोला किनारमा बसोबास गर्ने घरपरिवारलाई सतर्कता अपनाउन आग्रह गरेको छ।
प्रशासनले विशेषतः जोखिममा रहेका स्थानका नागरिकलाई आफ्नो प्रयोगका औषधि, लगाउने लुगाकपडा, लालपुर्जा, नागरिकता, नगद, गरगहना तथा अन्य अत्यावश्यक र बहुमूल्य सामग्री तत्काल बोकेर हिँड्न मिल्ने गरी सुरक्षित पोको बनाई राख्न निर्देशन दिएको छ।
बाढी वा डुवानको अवस्था आइपरेमा त्यस्ता पोको वा झोला लिएर सम्बन्धित वडा कार्यालयले तोकेको सुरक्षित स्थानमा सर्नु पर्ने सूचनासमेत जारी गरिएको छ।
त्यस्तै, स्थानीय तहलाई बाढी–डुवानमा पर्न सक्ने जनताको उद्दारका लागि सुरक्षा निकाय, संघसंस्था, स्वयंसेवकहरूसँग समन्वय गरी तयारी अवस्थामा रहन भनिएको छ।
साथै उद्दारपछि राख्न पहिचान गरिएका विद्यालय, सामुदायिक भवनलगायतका स्थानलाई सफा राख्न, र भवनको तालाचावी बोक्ने व्यक्तिलाई निरन्तर सम्पर्कमा राख्न पनि निर्देशन दिइएको छ।
जिल्ला प्रशासनले उद्योगी, व्यापारी, व्यवसायी तथा विपदमा सहयोग गर्न इच्छुक संघ–संस्था र व्यक्तिहरूलाई स्थानीय तह तथा प्रशासनसँग सम्पर्क र समन्वयमा रहन प्रमुख जिल्ला अधिकारी गोपाल प्रसाद अधिकारीद्वारा जारी बिज्ञप्तीमा उल्लेख गरिएको छ ।
त्यसैगरी, गलत सूचना प्रवाह हुँदा आम नागरिकमा अनावश्यक त्रास फैलने भएकाले सामाजिक सञ्जाल वा अन्य माध्यममार्फत तथ्यमा आधारित सूचना मात्र सम्प्रेषण गर्न पनि प्रशासनले जोड दिएको छ।
तस्बिर : AI
