काठमाण्डौं,१८ असोज । गए रातिदेखि जारी वर्षाले शनिबार रातिबाट भीषण रूप लिने भएको छ । शनिबार राति १० बजेदेखि २ बजेसम्म अति भारी वर्षा हुने जल तथा मौमम विज्ञान विभागले जनाएको छ । विभागका अनुसार अविरल वर्षाले ४० जिल्ला बढी प्रभावित हुनेछन् । ती जिल्लामा बाढीपहिरोका साथै डुबान हुने सम्भावना रहेको छ ।
विभागका अनुसार उच्च जोखिममा काठमाडौं उपत्यका पनि रहेको छ । विभागले उल्लेख गरेको सूचीअनुसार काठमाडौं उपत्यकाबाहेक बागमती प्रदेशका मकपवानपुर, सिन्धुली र चितवन बढी प्रभावित हुनेछन् । रामेछाप, सिन्धुपलाञ्चोक, काभ्रे, दोलखा पनि अति उच्च जोखिमको सूचीमा रहेका छन् ।
त्यसैगरी, मधेश प्रदेशका जिल्लाहरू महोत्तरी, पर्सा, रौतहट, बारा र सर्लाही पनि बढी प्रभावित हुनेछन् भने धनुषा, सप्तरी र सिरहा पनि प्रभावित हुनेछन् । ती जिल्लामा पनि भारी वर्षा सुरु हुन लागेको छ । त्यसैगरी कोशी प्रदेशका जिल्लाहरू उदयपुर र सुनसरी पनि बढी प्रभावित हुने जिल्लामा परेका छन् ।
इलाम, झापा, मोरङ, धनकुटा, तेह्रथुम, पाँचथर, भोजपुर, खोटाङ, ओखलढुंगा, सोलुखुम्बु, संखुवासभा, ताप्लेजुङ, रसुवा, नुवाकोट र धादिङमा पनि बाढीको उच्च जोखिम छ । ती जिल्लासँगै गोरखा, नवलपरासी पूर्व, नवलपरासी पश्चिम, रुपन्देही, कपिलवस्तु र आसपासका जिल्लाहरू उच्च जोखिममा परेका छन् । विभागका अनुसार कास्की, लमजुङ, पर्वत, स्याङ्जा, तनहुँ, गुल्मी, पाल्पा, अर्घाखाँची, प्युठान, दाङ, बाँके, बर्दियामा मध्यम जोखिमको सूचीमा परेका छन् ।
अहिले कोशी प्रदेशदेखि गण्डकी प्रदेशको पूर्वी भू–भागसम्म अधिकांश स्थानहरूमा वर्षा भइरहेको छ । जल तथा मौसम विज्ञान विभागका अनुसार उक्त क्षेत्रमा मेघगर्जन र चट्याङसहित वर्षा भइरहेको छ । विभागले वर्षा गराउने प्रणाली पूर्वउत्तर पूर्व दिशातर्फ सरिरहेको र ती क्षेत्रहरूमा थप वर्षा हुने सम्भावना रहेकोले सतर्कता अपनाउन समेत आग्रह गरेको छ ।
