दमक, असोज १८ । झापा जिल्लाको बाह्रदशी गाउँपालिका–४ मुन्सी कामत टोलमा आज बिहान एक पुरुषको खोलामा डुबेर मृत्यु भएको छ।
६२ वर्षीय मंगल सिंह मुर्मु घाघरा खोलामा तर्ने क्रममा खुट्टा चिप्लिएर खोलामा डुबेका हुन्। स्थानीय बासिन्दाले उनलाई देखेपछि तत्काल उद्धार गरी घरतर्फ लैजाने क्रममा मृत्यु भइसकेको थियो।
घटनाबारे जानकारी पाउनासाथ इलाका प्रहरी कार्यालय अनारमनीबाट प्रहरी निरीक्षक रुपेश राईको कमाण्डमा एसओसीओ टोली सहित प्रहरी घटनास्थलमा खटिएको थियो। घटनास्थल तथा शवलाई आवश्यक अनुसन्धानका लागि सुरक्षित राखिएको प्रहरीले जनाएको छ।
मृतकको शव पोस्टमार्टमका लागि प्रादेशिक मेची अस्पतालमा पठाइएको थियो। अस्पतालमा पोस्टमार्टमपछि मृतकको शव उनका छोरा श्याम मुर्मुले जिम्मा लिएर अन्तिम संस्कारका लागि लगेको प्रहरीले जानकारी दिएको छ।
