दमक, असोज २० । कोशी प्रदेशमा मनसुनजन्य विपद्का कारण ठुलो जनधनको क्षति भएको छ । कोशी प्रदेश प्रहरी कार्यालयले सार्वजनिक गरेको पछिल्लो तथ्याङ्कअनुसार बाढी र पहिरोमा परी हालसम्म ४३ जनाले ज्यान गुमाएका छन् भने दशौं हजार मानिस विस्थापित भएका छन् । विपद्बाट इलाममा मात्रै ३७ जनाको मृत्यु भएको छ । त्यसैगरी, पाँचथर र मोरङमा २–२ जना, उदयपुरमा २ जना र खोटाङमा ३ जनाको मृत्यु भएको तथ्याङ्कमा उल्लेख छ । इलाममा एक जना अझै बेपत्ता छन् ।
कोशी प्रदेश प्रहरी कार्यालयका अनुसार हालसम्म ५ हजार ९२५ घरका २६ हजार ९८४ जना विस्थापित भएका छन् । विपद्मा फसेका ५३२ जनाको उद्धार गरिएको छ । विवरणअनुसार १६ वटा घर पूर्ण रूपमा क्षतिग्रस्त भएका छन् । जसमा इलाममा १४ र पाँचथरमा २ घर रहेका छन् ।इलाम, पाँचथर र ताप्लेजुुङ जोड्ने मेची राजमार्ग पूर्ण रूपमा बन्द भएको छ । इलामको राजदुवालीमाथिको सडकमा पहिरो गएपछि उक्त राजमार्ग बन्द भएको हो । मेची राजमार्गका अन्य धेरै स्थानमा पनि पहिरो गएर अवरुद्ध भएको इलामकी प्रमुख जिल्ला अधिकारी सुनिता नेपालले जानकारी दिइन् ।
इलाम–झापा जोड्ने छोटो दुुरीको केचना–कञ्चनजङ्घा सडकमा पर्ने पुवा खोलाको बेलीब्रिज पनि शनिबार रातिको बाढीले बगाएको छ ।यसैगरि झापा गाउँपालिकास्थित सानोमाई खोलाको पुल बाढीले भत्काएको छ । बाढीले पुल भत्काउँदा झापा बजार, मिलन बस्ती तथा सुगा बथान जोड्ने हुलाकी सडक खण्ड अवरुद्ध बनेको छ ।अविरल वर्षासँगै केशलीया, सिंघिया, बक्राहा र रतुवा खोलामा आएको बाढीले विराटनगरसहित मोरङका विभिन्न स्थानमा ठुलो क्षति र्पुयाएको छ ।
यसैबीच सप्तकोशी नदीको बहाव आज साँझ प्रतिसेकेण्ड पाँच लाख ३३ हजार ५४० क्युसेक पुगेको छ । पानीको बहाव असामान्य रुपमा बढेकोले मध्याह्नदेखि कोशीको ५६ वटै ढोका खोलिएको छ । ब्यारेजबाट अति आवश्यक बाहेकको सवारी साधन आगवनमा रोक लगाएको छ । पहाडी जिल्लामा पानी निरन्तर परिरहेकाले नदीमा पानीको बहाव बढ्दै जाने अनुमान गरिएको छ ।
