मोरङ,२० असोज । कोशी प्रदेश सरकारले अहिलेको बाढी–पहिरोले प्रभावित क्षेत्रमा आफ्नो स्रोत साधनलाई भ्याएसम्म परिचालन गर्दै राहत तथा उद्धार कार्य तीव्र बनाइ रहेको छ ।
कोशी प्रदेशका आर्थिक मामिला तथा योजनामन्त्री रामबहादुर राना इलाममा रही राहत तथा उद्धारमा खटिनुभएको मुख्यमन्त्री तथा मन्त्रिपरिषद्को कार्यालयले बताएको छ । यसैगरी प्रदेशका अन्य मन्त्रीसमेत आ–आफ्ना जिल्लाका प्रभावित क्षेत्रमा गएर प्रत्यक्ष रूपमा उद्धार तथा राहत कार्यमा सहभागी भएका कार्यालयले बताएको छ ।
मुख्यमन्त्री हिक्मतकुमार कार्कीले प्रदेशका सबै मन्त्री स्थलगत रूपमा रहेर राहत कार्यमा जुटिरहेको बताँउनु भयो । उहाँले भौतिक तथा पूर्वाधार मन्त्रालयमार्फत बाढी–पहिरोका कारण अवरुद्ध भएका सडक तथा साना बाटो खोल्नका लागि १४ वटा पूर्वाधार कार्यालयलाई तत्काल काम अघि बढाउन निर्देशन दिनुभएको बताँउनु भएको छ ।
मुख्यमन्त्री कार्कीले पालिकासँगको समन्वय र सहकार्यलाई अझ सुदृढ बनाई प्रदेश सरकार विपद् व्यवस्थापनमा पूर्णरूपमा सक्रिय रहेको स्पष्ट पार्नुभएको छ ।
यसैगरी प्रदेशको आन्तरिक मामिला तथा कानून मन्त्रालयले जिल्लास्तरीय सुरक्षा निकाय र प्रमुख जिल्ला अधिकारी मार्फत समन्वय र सहकार्य गरिरहेको तथा सबैतिर आवश्यक समन्वय गरी उद्धार कार्यमा सक्रियता देखाएको छ । आन्तरिक मामिला तथा कानूनमन्त्री रेवतीरमण भण्डारी फिल्डमा नै रही नागरिकको सुरक्षाका लागि काम गरिरहेको मन्त्रालयले बताएको छ ।
मन्त्रालयले केही दिनअघि प्रदेशका सुरक्षा निकायलाई लाइफ ज्याकेट, बोतलगायतका २ करोड रुपैयाँ बराबरका विपद्–उद्धार सामग्री वितरण गरेका कारण उद्धार कार्य सहज भएको बताँएको छ । पहिरोमा परी इलाममा मात्रै पछिल्लो तथ्याङ्क अनुसार ३७ जनाको ज्यान गएको प्रहरीले जनाएको छ ।
