काठमाण्डौं,२० असोज । निवर्तमान प्रधानमन्त्री केपी शर्मा ओली र निवर्तमान गृहमन्त्री रमेश लेखकलाई पक्राउ गर्न माग गर्दै सामाजिक सञ्जालमा अभियान चलाइएको छ ।
जेन–जी आन्दोलनबाट सत्ताच्युत भएको उहाँहरूले आन्दोलनमा दमन गरेको आरोप लगाउँदै पक्राउ गर्न माग गरिएको जानकारी पाइएको छ।
आन्दोलनमा दमन गरेको भन्दै ओली र लेखकसहित पाँच जनाको राहदानी रोक्का गरिएको छ भने काठमाडौं उपत्यकाबाट बाहिर जानुपर्ने अनुमति लिनुपर्ने भनिएको हो ।
जेन जी आन्दोलनको अगुवाको रुपमा रहेका सुदन गुरुङलगायतका टोलीले विगत केही समयदेखि नै ओली र लेखकलाई पक्राउ गर्नुपर्ने माग राख्दै आएका थिए् । भदौ २३ को आन्दोलनमा मारिएका जेन जीहरुको जिम्मेवार ओली र लेखक भएको उनीहरुको दाबी रहेको छ ।
प्रधानमन्त्री सुशीला कार्की र गृहमन्त्री ओमप्रकाश अर्यालसमक्ष गुरुङलगायतका जेन जी आन्दोलनका अगुवाले सरकार बनेदेखि नै ओली र लेखकलाई पक्राउ गर्नुका साथै अन्य नेताहलाई कारबाहीको दायरामा ल्याउनुपर्ने बताउँदै आइ रहनु भएको छ । पछिल्ला दिनमा एमालेका पोलिटब्युरो सदस्य महेश बस्नेतलाई पनि उहाँहरुले पक्राउ गर्नुपर्ने माग गर्दै आँउनु भएको छ। गत शनिबार बालुवाटारस्थित प्रधानमन्त्री निवासमा भएको जेन जी आन्दोलनका अगुवा र सरकारी अधिकारीसँगको छलफलमा पनि उक्त माग अघि सारिएको थियो । गुरुङले ओली,लेखक र बस्नेतलाई कारबाहीको दायरामा ल्याउनुपर्ने माग गर्नु भएको थियो।
सरकारले कानुनी प्रक्रियामार्फत अघि बढ्ने बताएपछि सामाजिक सञ्जालमार्फत जेन जी अगुवाले दबाब बढाउन खोजेको हुन् । उहाँहरुले सार्वजनिक रुपमा दबाब बढाएर सरकारलाई पक्राउ गर्न सजिलो बनाउन खोजेको देखिन्छ । यद्यपी, उहाँहरुको उक्त दबाबले ओली, लेखकलाई पक्राउ गर्न कति कानुनी बाटो खोल्छ ? भन्ने चाहिँ चासोको विषय बनेको छ ।
