काठमाण्डौं,२२ असोज। दल र आन्दोलनकारी समूहलाई विश्वासमा लिएर चुनावको वातावरण बनाउन नागरिक अगुवाले अपिल गरेका हुन्। बुधबार ३० जना नागरिक अगुवाले अपिलमार्फत् राजनीतिक दल र आन्दोलनकारी जेन–जी समूहसँग संवाद गरी सबैलाई विश्वासमा लिएर चुनावको वातावरण तयार पार्न प्रधानमन्त्री सुशीला कार्की नेतृत्वको सरकारलाई आग्रह गरेका छन्।
झलक सुवेदी, लोकराज बराल, विद्याधर मल्लिक, कृष्ण खनाल, केदारभक्त माथेमा, तारानाथ दाहाल, संगीता लामा, तुलानारायण शाह, गेजा शर्मा वाग्ले, युग पाठकलगायतले संघीय लोकतान्त्रिक गणतन्त्र र संविधान सभामार्फत बनेको संविधानको रक्षाका लागि निर्धारित मिति फागुन २१ मा नै चुनाव गर्नु अन्तरिम सरकारको राष्ट्रिय दायित्व भएको बताँउनु भएको छ ।
सुरक्षा निकायको मनोबल उच्च बनाइ आवश्यक साधन–स्रोत व्यवस्थापन गरी शान्ति–सुव्यवस्था बहाल गर्न पनि विज्ञप्तिमार्फत् सरकारको ध्यानाकर्षण गराइएको जनाइएको छ । राजनीतिक दलहरूलाई पनि चुनावमा सहभागी हुन नागरिक अगुवाको अपिल रहेको छ । यसअघि मङगलबार विभिन्न दलका युवा नेताहरूले दोस्रो र तेस्रो तहका नेताहरूलाई पार्टी पुनर्गठनमा लाग्न आह्वान समेत गरेका थिए ।
