विराटनगर,२२ असोज । कोशी प्रदेश सरकारले बाढी पहिरोका प्रभावित परिवारलाई बुधबार पनि राहत सामग्री पठाएको बताएको छ ।
हेलिकप्टर र अन्य सवारी साधनमार्फत मंगलबार इलाम र झापामा राहत पठाएको सरकारले बुधबार तीन ट्रक सामग्री इलामको माइजोगमाई, माई, इलाम, नगरपालिका र झापा गाउँपालिकामा पठाएको मुख्यमन्त्री कार्यालयले बताएको छ ।
आन्तरिक मामिला तथा कानुनमन्त्री रेवतीरमण भण्डारीका अनुसार प्रदेश सरकारसँग भएका सबै सामग्रीहरू तीव्र गतिमा पठाइएको हो । मुख्यमन्त्री हिक्मतकुमार कार्कीले हिजो राहत वितरणलाई व्यवस्थित गर्न योजना बनाउन सरकारी संयन्त्रको बैठक राखेपछि राहत पठाउन थालिएको छ।
मुख्यमन्त्री कार्की सेनाको हेलिकप्टरमा १० बोरा चामलसहितको राहत बोकेर मंगलबार इलाम पुगेको हो । प्रदेश सरकारले मृतकका परिवारलाई राहत रकम साथै अत्यावश्यक सामग्री पठाउने काम पनि अगाडि बढाएको बताएको छ ।
प्रदेश सरकारका मन्त्रीहरू पनि आ(आफ्नो ठाउँमा फिल्डमै गएर निर्माण र पुनर्निर्माणको काममा सक्रिय रहेको मन्त्री भण्डारीले बताउनु भयो। सरकारले राहत सामग्री पठाएसँगै भत्किएका सडक र अन्य संरचनाहरू बनाउनका लागि तयारी थालेको बताएको छ ।
