दमक, २६ असोज । जेनजी आन्दोलनका क्रममा इलाका प्रहरी कार्यालय दमकबाट लुटिएको अर्को हतियार फेला परेको प्रहरीले जनाएको छ ।
आइतबार बिहान अन्दाजी ७ः३० बजे दमक –५ धनेश्वर मन्दिरको पूर्वपट्टीको गेटनजिक जेनजी आन्दोलनका बेला लुटिएकामध्ये .३०३ मार्क ३ राईफल एक थान फेला परेको छ । सो बन्दुक बेवारिसे अवस्थामा स्थानीयबासीले देखेर प्रहरीलाई खबर गरेका थिए भने उक्त हतियार इलका प्रहरी र्कायलय दमक ल्याई राखिएको प्रहरीले जनाएको छ ।
इलका प्रहरी र्कायलय दमकबाटै लुटिएको एसएलआरको ५५ राउण्ड गोली दुई दिनअघि कमलमा फेला परेको थियो ।कमल गाउँपालिका वडा नं.–७ रंगपुर बस्ने ५५ वर्षीय गंगाप्रसाद पाण्डेले केराको पात काट्ने क्रममा आफ्नो खेतबारीमा सेतो बोरामा एसएलआरको गोली ७.६२ एमएम ५५ राउण्ड भेटेको प्रहरीले जनाएको छ ।
जेनजी आन्दोलनका क्रममा झापामा प्रहरीबाट लुटिएका २४ थान हतियार , ५६९० वटा गोली र १८० सेल अश्रुग्यास गायव भएको थियो । त्यसमध्ये एउटा हतियार र ५५ राउण्ड गोली मात्र भेटिएको प्रहरीले जनाएको छ। अरु हतियार आन्दोलनकारीहरुसंगै रहेको छ । सरकारले असोज मसान्तभित्र हतियार फिर्ता गर्न भनेपनि अझै फिर्ता भएको छैन ।
यसअघि मानवअधिकारवादीहरुको रोहवरमा आन्दोलनकारीहरुले फिर्ता गरेको ८५ थान हतियार चारआलीस्थित अरिदमण गणले प्रहरीलाई जिम्मा लगाएको छ ।
