दमक, १० पुस / झापाको दमकमा एकसाथ दुई पुस्तक कृतिको लोकार्पण भएको छ ।
प्रतिभा निकेतन र विद्याशिल्प एकेडेमीको संयुक्त आयोजनामा भाङबारीमा आयोजित कार्यक्रममा प्रा.डा. गोविन्दराज भट्टराई बारे लेखिएको ‘ज्ञानगुनका कुरा’ र खेमलाल पोखरेलको रम्बास कविता संग्रह ‘परिघटना’को साहित्यिक कार्यक्रमबीच एकसाथ लोकार्पण भएको हो ।
ज्ञानगुन प्रकाशनले प्रकाशनमा ल्याएको १२ जना लेखकले भट्टराईमाथि लेखेको लेखहरुको संग्रह भट्टराईको ८७ औं कृतिका रुपमा आएको छ । जसलाई कार्यक्रममा उपन्यासकार वीरेन्द्र थोक्लिहाङले समीक्षात्मक टिप्पणी गर्नुभएको छ । उहाँले केही नगरी बस्नै नसक्ने भट्टराईको स्वभावले सृजना क्षेत्रमा महत्वपूर्ण काम गर्न सफल भएको चर्चा गर्नुभयो ।
सो अवसरमा दमककै पुराना साहित्यकार खेमलाल पोखरेलको फरक संरचनाको रम्बास कविता कृति ‘परिघटना’माथि साहित्यकार दीपक सुवेदीले बोल्नु भएको थियो । उहाँले रम्बास कविताको संरचनामा देखिएका केही समस्यासहितका बारेमा टिप्पणी गर्नुभयो । साथै उहाँले पोखेरलको लेखनशैलीका बारेमा चर्चा गर्नुभयो ।
कार्यक्रममा हास्यव्यग्य साहित्यकार लक्ष्मण गाम्नागेले लेख्न बाँकी कविता शिर्षकको कवितामार्फत देशको हालको अवस्थामाथि व्यग्य प्रहार गर्नुभयो ।
अभागी थेगुवा, बैदिक अत्री, प्रीति सैन्धवी बस्नेतका साथै विद्याशिल्प विद्यालयका विद्यार्थीहरुले समेत कविता वाचन गर्नुभयो । माधव खनाल, राम विष्टसहितले लोकगीत प्रस्तुत गर्नुभयो । कार्यक्रम प्रतिभा निकेतनका अध्यक्ष कमलराज भट्टराईको अध्यक्षतामा सम्पन्न भएको थियो ।
