झापा,१३ पुष। झापामा लामो समयदेखि साइकल,मोवाइल,मोटरसाइकल,फलामको पाइप,मोटरलगायतका सामानहरु चोरी गर्ने दुईजनालाई एक गोदाम चोरीको सामानसहित प्रहरीले अर्जुनधाराबाट पक्राउ गरेको जनाएको छ ।
अर्जुनधारा वडा नं.६बिहानी टोल बस्ने मोहमद उसिम मुदिलको घरमा डेरा लिएर बस्ने दुईजना भारतीयलाई प्रहरीले पक्राउ गरेको छ। पक्राउ पर्नेहरुमा भारत विहार राज्य किसनगंज स्थायी ठेगाना भई हाल अर्जुनधारा वडा नं. ६बस्ने बर्ष ३५की खतिजा वेगम र सोही ठाउँ बस्ने बर्ष २३ का मोहमद रज्जाक पक्राउ परेका छन् ।
विभिन्न सामानहरु चोरी गरी लुकाईछिपाई राखेको भन्ने जानकारी प्राप्त भएपछि इलाका प्रहरी कार्यालय बिर्तामोडबाट प्रहरी टोली खटिएर चोरीका सामान बरामद गरेको थियो । प्रहरीले उनीहरूको कोठाबाट ९ थान साइकल, २३ थान मोटर , फलामको पाईपको ४७ वटा टुक्राहरु, प्रदेश नं. १–०१–०१५प९३४४नम्बरको मोटरसाइकल , मोटरसाइकलको सवारी दर्ता किताव एक थान,स्पोकसहितको टायर रिङ–६ थान, रिङ मात्र थान–१, फलामको रड थान–१८,गाडी धुने पम्प एक थान, मोटरको फलामको रोटर थान– ६, ग्यास इन्डेक्सन चुलो एक थान र मोटरसाइकलको मोटरगार्ड, सकप र टि सहितको एक थानलगायतका सामान बरामद भएको प्रहरीले जनाएको छ ।
