नेपाली कांग्रेसको विशेष महाधिवेशनको बन्दसत्रको कार्यक्रम सुरु

काठमाडौँ,२८ पुस । नेपाली कांग्रेसको विशेष महाधिवेशनको दोस्रो दिन सोमबार बन्दसत्रको कार्यक्रम सुरु भएको छ ।आइतबार राजधानीको भृकुटीमण्डपमा बहुमत महाधिवेशन प्रतिनिधिका साथ विशेष महाधिवेशनको उद्घाटन भएको छ ।
नेपाली कांग्रेसका महामन्त्रीद्वय गगन थापा र विश्वप्रकाश शर्माले आह्वान गरेको दोस्रो विशेष महाधिवेशनअन्तर्गत बन्दसत्र शुरु भएको छ । काठमाडौंको भृकुटीमण्डपमा जारी महाधिवेशनको दोस्रो दिन बन्दसत्र चरणमा प्रवेश गरेको छ।
आइतवार उद्घाटन सत्र सम्पन्न भएपछि सोमवार बिहान १० बजेदेखि बन्दसत्र शुरु भएको हो । बन्दसत्रको शुरुवातमा विशेष महाधिवेशन कार्यविधि, २०८२ पारित गरिएको हो । जसले पार्टीको नीति, विधान संशोधन र नेतृत्व चयनको बाटो खोलेको छ ।
महाधिवेशनमा सहभागी प्रतिनिधिहरूको नाम दर्ता प्रक्रिया जारी रहेको छ । बन्दसत्रमा राजनीतिक प्रतिवेदन, साङ्गठनिक प्रतिवेदन लगायतका विषयमा छलफल हुनेछ भने समूहगत बहसका लागि प्रतिनिधिहरूलाई विभाजन गरिने कार्यक्रम रहेको छ । पार्टी संस्थापन पक्षले यसलाई अवैधानिक भन्दै विरोध गरेको छ भने आयोजक पक्षले विधानसम्मत रहेको तर्क गरेको छ । बन्दसत्रका निर्णयले पार्टीको आगामी दिशा निर्धारण गर्ने अपेक्षा गरिएको छ ।