तेह्रथुम/ तेह्रथुमको चोलुङ पार्कमा फुलेको रात्ताम्यै गुराँसले पर्यटकहरुलाई स्वागत गरी रहेको छ । पार्कको छेउमा फुलेको गुराँससँगै यतीबेला सेल्फी लिने र टिकटक बनाउनेको भिड देखिन्छ । पार्कमा फुलेको गुराँससँग रमाउन स्थानीय तथा आन्तरिक पर्यटकहरुको घुइँचोनै लाग्न थालेको छ ।
तिनजुरे, मिल्के, जलजले (टिएमजे) को प्रबेशद्धारको रुपमा रहेको पार्क पर्यटकले भरिभराउ बन्न थालेको छ । गुराँसको राजधानी (टिएमजे) को तल्लो क्षेत्रमा गुराँस फुल्न सुरु भएसँगै पर्यटक आउन थालेका हुन । गुराँस फुल्ने सिजन शुरु भएसँगै यस क्षेत्रको स्वरूपनै रंगिन बन्दै गएको छ । यहाँका होटल व्यवसायी समेत पर्यटकहरुको स्वागत सत्कारका लागि आतुर बन्न थालेका छन ।
प्राकृतिक सुन्दरतासँगै बिभीन्न प्रजातीका गुराँस फुल्ने सिजन सुरु भएकाले रमाईलो भएको पर्यटकहरु बताउँछन् । फागुन देखी बैशाखसम्म फुल्ने गुराँस पर्यटकको मुख्य आकर्षण हो । खासगरी सार्वजानिक बिदा तथा शनिबारका दिन पर्यटकको चाप हुन्छ । भिडले फोटो खिच्न समेत पालो कुर्नु पर्ने पर्यटकहरु बताउँछन् ।
बसन्तपुरको चोलसुङ पार्क, आरआर गार्डेन, घुर्बिसे, पाथिभरा, चौकी, मंगलबारे, गुफापोखरी हुँदै तिनजुरे मिल्के जलजले क्षेत्रमा गुराँस फुल्ने गर्छ । यतीबेला भने यसक्षेत्रको तल्लो भेगबाट बिस्तारै माथिल्लो भेग तर्फ गुराँस फुल्न थालेको छ । फोटोमा हेरेको भन्दा प्रत्यक्ष रुपमा गुराँस फुलेको देख्दा फरक अनुभुती हुनेगरेको पर्यटकहरुको अनुभव रहेको छ ।
विश्वमा पाईने ३२ प्रजाती मध्ये २८ प्रजातीको गुराँस यस क्षेत्रमा पाईन्छ । गुराँस १ हजार ५ सय मिटरदेखि ५ हजार ५ सय मिटर सम्मको उचाइमा पाइन्छ । पुर्वी तराईका जिल्ला साथै काठमाडौ र छिमेकी देश भारतबाटपनि बाक्लो मात्रामा पर्यटकहरु अहिले टिएमजे पुग्ने गरेका छन ।
