काठमाडौं– नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले आगामी निर्वाचनपछि आफूहरु पहिलो शक्ति बन्ने दाबी गरेका छन्। कार्यकर्ता प्रशिक्षण कार्यक्रममा सहभागी हुन पोखरा पुगेका प्रचण्डले माओवादी आफ्नै बलमा पहिलो पार्टी बन्ने दाबी गरेका हुन्।
अध्यक्ष प्रचण्डले भने, ‘निर्वाचनमा एक्लै जाने कि गठबन्धन गरेर जाने भन्ने विषय पनि उठ्ने गरेको छ। वडादेखि नै गठबन्धन होला र जितौंला भनेर बस्ने होइन, जनतासँग सम्बन्ध राम्रो बनाउँदै आफ्नै खुट्टामा उभिएर चुनाव जित्ने हो।’
पछिल्लो समय पार्टीप्रति धेरै लहर बढेको र जनचासो बढेको उनको भनाइ थियो। अहिले संविधान जोगाउने दल नै माओवादी रहेछ भन्ने छाप आम जनतामा परेको उनले दाबी गरे।
पछिल्लो समय सपोर्ट नगरेका बुध्दिजीवीले अहिले रियलाइजेशन गरेको बताउँदै उनले अन्य दलहरुले आफूहरुसँग गठबन्धन गर्न खोजिरहेको बताए। उनले चुनावमा गठबन्धन होला र चुनावमा जितिएला भनेर नबस्नसमेत पार्टीका नेताहरुलाई आग्रह गरेका छन्।
उनले भने, ‘हामी आफ्नै खुट्टामा उभिने हो, आफ्नै संगठनको शक्तिलाई बलियो पार्ने हो। जनतासँगको सम्बन्धलाई बलियो पार्ने हो।’
