पथरी, १५ जेठ / सृजना क्षेत्रमा सक्रिय मोरङ पथरी शनिश्चरेमा जेठ १५ १६ गते साहित्य र कलाको कार्यक्रम हुने भएको छ ।
नगरपालिकाको उपसमितिका रुपमा रहेको कला साहित्य प्रवद्र्धन समितिको आयोजनामा ‘सृजना अनुष्ठान तथा श्रष्टा सम्मान कार्यक्रम’ नामक अन्तर्गत १५ गते स्थानीय सर्जक र विद्यार्थीबीच ‘सृजना विमर्श’ हुने भएको छ । जसमा स्थानीय सर्जकहरुः, कृष्णप्रसाद अधिकारी, विद्रोही साहिला, सुमन राई, गणेश बाछाना राई, राजेन्द्र विवश, रविन भट्टराई सायरी, ओमप्रकाश शर्मा अभिन्न, लक्ष्मीप्रसाद फुयाल, मञ्जरी घिमिरे, केशव निरौला, कमल तिम्सिना, रमेश ओझेल, विवेक कार्कीसहितले आफ्ना सृजना प्रस्तुत गर्नुहुनेछ । नगरका विद्यार्थीसमेत सहभागि रहने कार्यक्रममा प्रमुख सहजकर्ताका रुपमा कवि हेमन यात्रीले भूमिका निर्वाह गर्नुहुने कार्यक्रम संयोजक एवम् प्रवद्र्धन समिति सल्लाहकार भूपेन्द्रराज तिम्सिनाले जनाउनु भयो ।
१६ गते कवि मनु मञ्जिल वक्ताका रुपमा रहेको कार्यक्रममा विवश बलिभद्र कोइराला, धनकुटे कान्छा, रेखा सुवेदी, रोहित पराई, हेमन यात्री, दिल भुटानी र पहिलो पथरी शनिश्चरे पोयट आइडल लोकसागर साम्बाले कविता तथा गजल प्रस्तुत गर्नुहुने छ । जसमा पहिलो पथरी शनिश्चरे सिंगिङ आइडल राज लोहार र डान्सिङ आइडल गरिमा मगरको नृत्य तथा १० दिने नाट्य कार्यशालामा उत्पादित नाटकको प्रस्तुतिले कार्यक्रमलाई थप आकर्षक बनाउने विश्वास गरिएको छ । कार्यशालामा नगरका २० जनाको सहभागिता रहेको छ ।
समिति अध्यक्ष धनराज राई अमीरले सो अवसरमा खोजमूलक पुस्तक लेखनका हिसाबले राष्ट्रिय चिनारी कायम गर्नुभएका नगरमा सबैभन्दा बढी पुस्तक कृति प्रकाशित गर्ने १४ पुस्तकका लेखक दीपेन्द्रराज तिम्सिनालाई २५ हजार नगद, मुहारचित्र, दोसल्ला र सम्मानपत्रले मरणोप्रान्त नगर श्रष्टा सम्मान प्रदान गरिने पनि जानकारी गराउनु भयो ।
संस्थाले २०७५ सालबाट वर्षेनी कला र साहित्य क्षेत्रका गतिविधि सञ्चालन गर्दै आएको छ ।
