स्टेप अफ एजुकेसनद्वारा ओपन फुटसल आयोजना

झापा दमक ,२२ जेठ । स्टेप अफ एजुकेसन कन्सल्टेन्सीले +2 विद्यार्थीहरूका लागि ओपन फुटसल प्रतियोगिता आयोजना गर्ने भएको छ।

झापाको दमक–६, बेलडाँगी रोडमा सञ्चालनमा रहेको स्टेप अफ एजुकेसन कन्सल्टेन्सीले +2 पूरा गरेर बसेका विद्यार्थीहरूलाई लक्षित गर्दै “+2 ओपन फुटसल टुर्नामेन्ट” आयोजना गर्ने भएको हो। आयोजक संस्था स्टेप अफ सक्सेसका संस्थापक रवीन दाहालका अनुसार प्रतियोगिता खेलकुद, मनोरञ्जन र भविष्यका अवसरसँग जोड्ने उद्देश्यले आयोजना गर्न लागिएको हो।

आयोजक रवीन दाहालले जानकारी दिँदै भन्नुभयो,“यो प्रतियोगिता विद्यार्थीहरूका लागि खेलकुदसँगै अवसर र आत्मविकासको उत्कृष्ट संगम हुनेछ।”
उक्त प्रतियोगिता यही २३ र २४ गते दमक–५, गोर्खाली टोलस्थित बिस्ट फुटसलमा सञ्चालन हुनेछ। बिर्तामोडदेखि मोरङसम्मका विभिन्न कलेज तथा क्लबहरूको सक्रिय सहभागिता रहने आयोजकले जनाएको छ।

प्रतियोगितामा १६ वटा टिमबीच रोमाञ्चक प्रतिस्पर्धा हुने छ। खेल २०–२० मिनेटको हुने व्यवस्था गरिएको छ भने सम्पूर्ण प्रतियोगिताभर सुर्तीजन्य पदार्थको पूर्ण प्रतिबन्ध लगाइएको छ।

प्रतिभागी टिमहरूमा पशुपति आवासीय माध्यमिक विद्यालय, ग्लोबल एजुकेसन कलेज, टिम ६९, सिर्जनशील युथ क्लब, जेम्स डिकम, इचोम, स्किल भ्याली, नेपाल दर्शन कलेज, पाथीभरा युनाइटेड, राइजिङ एफसी, हिमावी, मोरङ मोडल कलेज, वाल्मीकि मेमोरियल कलेज, टिम सिनर्जी लगायतका टोलीहरू सहभागी हुनेछन्।

प्रतियोगिताको विजेता टोलीले ३० हजार रुपैयाँ नगदसहित ट्रफी र प्रमाणपत्र प्राप्त गर्नेछ भने उपविजेताले २० हजार रुपैयाँ नगदसहित ट्रफी र प्रमाणपत्र प्राप्त गर्नेछ।

त्यसैगरी, गोलाप्रथाबाट छनोट गरिने ३ जना भाग्यशाली सहभागीलाई यूकेको निःशुल्क टिकट प्रदान गरिने आयोजकले जनाएको छ। साथै, सबै सहभागी टिम तथा खेलाडीहरूलाई निःशुल्क IELTS र PTE कक्षामा अध्ययन गर्ने अवसर समेत उपलब्ध गराइनेछ।

व्यक्तिगत विधातर्फ उत्कृष्ट खेलाडी, सर्वाधिक गोलकर्ता र उत्कृष्ट गोलकिपरलाई ट्रफी तथा प्रमाणपत्रद्वारा सम्मान गरिनेछ।
आयोजक बालचन्द कार्कीका अनुसार यो प्रतियोगिताले विद्यार्थीहरूमा खेलकुदप्रति रुचि बढाउनुका साथै अनुशासन, टिमवर्क र नेतृत्व क्षमताको विकास गर्ने अपेक्षा गरिएको छ।