भारतीय प्रधानमन्त्री नरेन्द्र मोदीले भारतमा सबैभन्दा लामो समयसम्म लगातार निर्वाचित प्रधानमन्त्री बन्ने ऐतिहासिक रेकर्ड कायम गरेका छन्। २६ मे २०१४ मा पहिलोपटक प्रधानमन्त्रीको रूपमा शपथ लिएका मोदीले आज बुधबार (१० जुन) प्रधानमन्त्रीको रूपमा लगातार ४ हजार ३९९ दिनको कार्यकाल पूरा गरेका हुन्। यो प्रधानमन्त्रीको रूपमा मोदीको लगातार तेस्रो कार्यकाल हो।
भारतीय सञ्चार माध्यमहरूका अनुसार यसअघि यो रेकर्ड देशका पहिलो प्रधानमन्त्री जवाहरलाल नेहरूको नाममा थियो। भारतको संविधान लागू भएपछि सन् १९५२ मा भएको पहिलो आम निर्वाचनमार्फत निर्वाचित भएर नेहरूले १३ मे १९५२ देखि २७ मे १९६४ (मृत्युपर्यन्त) सम्म लगातार ४ हजार ३९८ दिन प्रधानमन्त्रीको रूपमा सेवा गरेका थिए।
यद्यपि, जवाहरलाल नेहरूको समग्र कार्यकाल (सन् १९४७ को अन्तरिम सरकार सहित) १६ वर्ष २८६ दिन अर्थात् कुल ६ हजार १३० दिन रहेको छ। तर, देशमा संविधान लागू भएर ‘निर्वाचित’ भएको अवधिलाई मात्र गणना गर्दा नरेन्द्र मोदीले नेहरूको लगातारको कार्यकालको रेकर्डलाई उछिनेका हुन्। गैर-कांग्रेस पृष्ठभूमिका नेतामा मोदी यसअघि नै सबैभन्दा लामो समय देशको नेतृत्व गर्ने प्रधानमन्त्री बनिसकेका छन्।
यस ऐतिहासिक अवसरमा प्रधानमन्त्री मोदीले इन्स्टाग्राममा एक पोस्ट साझा गर्दै लेखेका छन्, “सार्वजनिक सेवा सुशासनको सबैभन्दा ठूलो परीक्षा हो। नम्रता, समर्पण र भक्तिका साथ निरन्तर काम गर्ने व्यक्तिले मात्र जनताको विश्वास कमाउँछ।”
यसअघि, आफ्नो नेतृत्वमा सरकारको १२ वर्ष पूरा भएको अवसरमा पनि उनले राष्ट्र निर्माणप्रतिको संकल्प दोहोर्याएका थिए। उनले लेखेका थिए, “विगत १२ वर्षदेखि ‘सबका साथ, सबका विकास’ को भावनाबाट प्रेरित निरन्तर प्रयासहरूमार्फत हामी एक बलियो र आत्मनिर्भर भारततर्फ अघि बढिरहेका छौं।” मोदीको यो कार्यकाललाई भारतीय राजनीतिमा ‘मजबुत’ र ‘निर्णायक’ कालखण्डका रूपमा हेरिएको छ।
