काठमाडौं,२७ जेठ। भूमि व्यवस्था, सहकारी तथा गरिबी निवारण मन्त्रालयका सचिव मदन भुजेलले सहकारी क्षेत्र नेपालको अर्थतन्त्रको महत्वपूर्ण आधार भएकाले यसको प्रवद्र्धन आवश्यक रहेको बताउनु भएको छ ।
बहुनियामक व्यवस्थाका कारण सहकारी क्षेत्रमा देखिएको अन्योलता र त्यसको समाधानका उपायबारे आयोजित अन्तरक्रिया कार्यक्रममा बोल्दै सचिव भुजेलले सहकारीलाई प्रवद्र्धन गर्नुको विकल्प नभएको उल्लेख गर्नुभयो । उहाँले सरकारले सहकारी क्षेत्रमा हस्तक्षेप गर्ने नभई सहयोगीको भूमिका निर्वाह गर्ने बताउनु भयो ।
उहाँले भन्न् भयो, ‘यो सहकारी अर्थतन्त्रको एउटा महत्वपूर्ण अंग हो । यसलाई प्रवद्र्धन गर्नुको कुनै विकल्प छैन । सरकारले सहकारीलाई प्रवद्र्धन गर्न एउटा सहयोगीको भूमीका निर्वाह गर्ने हो, सरकारले हस्तक्षेप गर्ने होइन । त्यसकारण सहकारीको ठूलो योगदान छ । यसले पूँजी संकलन गर्न, लगानी बढाउन, रोजगारी सिर्जना गर्न सहकारीले विशेष भूमिका खेलेको छ । समावेशीकरण गर्नको लागि, सशक्तीकरण गर्नको लागि समग्र अर्थतन्त्रलाई एउटा गतिशिल बनाउनका लागि भूमिका खेलेको छ ।’
उहाँले सहकारीले पूँजी संकलन, लगानी विस्तार तथा रोजगारी सिर्जनामा महत्वपूर्ण योगदान पुर्याएको बताउनु भयो । साथै, समावेशीकरण र नागरिक सशक्तीकरणमार्फत समग्र अर्थतन्त्रलाई गतिशील बनाउन पनि सहकारी क्षेत्रले उल्लेखनीय भूमिका खेलेको उहाँले भनाई छ।
सचिव भुजेलले सहकारी क्षेत्रको दिगो विकास र प्रभावकारी सञ्चालनका लागि आवश्यक नीतिगत सुधार तथा समन्वयलाई प्राथमिकता दिनुपर्ने धारणा राख्दै यसको थप प्रवद्र्धनमा सबै पक्षको ध्यान जानुपर्ने बताउनु भयो ।
