विराटनगर २३ असार । जिल्ला अदालत मोरङले हाजिरी जमानीमा छाड्न आदेश दिए पनि विराटनगरका कांग्रेस नेता अभिषेक गिरी थुनामुक्त हुन पाएनन्। अदालतको आदेशपछि सोमबार राति केन्द्रीय अनुसन्धान ब्यूरो (सीआईबी) ले उहाँलाई काठमाडौं लगेको हो।
मोरङमा आपराधिक लाभ, संगठित अपराध र सम्पत्ति शुद्धीकरणसम्बन्धी अनुसन्धान चलिरहेका बेला सीआईबीले ठगी र आपराधिक विश्वासघातसम्बन्धी छुट्टै मुद्दामा पक्राउ अनुमति लिएर गिरीलाई नियन्त्रणमा लिएको जनाएको छ।
सीआईबीका अनुसार गिरीमाथि करोडौं रुपैयाँ बराबरको आर्थिक कारोबारमा ठगी र विश्वासघात गरेको आरोप छ। घरजग्गा खरिद, ठूलो रकमको चेक कारोबार तथा व्यवसायीसँगको लेनदेनसम्बन्धी उजुरीका आधारमा अनुसन्धान अघि बढाइएको सीआईबीले जनाएको छ।
गिरीलाई पक्राउ गर्न काठमाडौं जिल्ला अदालतबाट अनुमति लिइएको बताइएको छ। उनलाई विराटनगर विमानस्थलबाट बुद्ध एयरमार्फत काठमाडौं लगिएको थियो। विमानस्थलमा गिरीले आफूलाई कुटपिट र यातना दिएको आरोप लगाउँदै आफ्नो ज्यान जोखिममा रहेको दाबी गरेका थिए।
यसअघि मोरङ प्रहरीले असार १३ गते गिरीलाई नियन्त्रणमा लिएर अनुसन्धान गरिरहेको थियो। सोमबार जिल्ला अदालत मोरङका न्यायाधीश टंकबहादुर महतको इजलासले म्याद थप अस्वीकार गर्दै हाजिरी जमानीमा छाड्ने आदेश दिएको थियो। तर अदालतबाट बाहिरिएलगत्तै सीआईबीले उनलाई पुनः नियन्त्रणमा लिएको हो।
सीआईबीले अहिले गिरीको आर्थिक कारोबार, सम्पत्तिको स्रोत, बैंकिङ विवरण र व्यवसायीसँगको लेनदेनमाथि अनुसन्धान गरिरहेको जनाएको छ।
गिरी यसअघि अपहरण तथा शरीर बन्धक मुद्दामा नौ वर्ष कैद भुक्तान गरी २०७९ सालमा जेलमुक्त भएका थिए। जेलबाट छुटेपछि उनी नेपाली कांग्रेसको राजनीतिमा सक्रिय भएका थिए। पछिल्लो समय उनी विराटनगरका राजनीतिक गतिविधिमा सक्रिय देखिँदै आएका थिए।
प्रहरीले भने गिरीमाथिको अनुसन्धान आर्थिक अपराध र अन्य गतिविधिसँग जोडिएका विषयमा समेत विस्तार हुन सक्ने जनाएको छ।
