काठमाडौं,२३ असार । नेपाल रेडक्रस सोसाइटीले संस्थाका सवारी साधन, एम्बुलेन्स तथा रेडक्रस चिन्हको अनधिकृत प्रयोग नगर्न चेतावनी दिएको छ।
रेडक्रसका सवारी साधन व्यक्तिगत, पारिवारिक, व्यावसायिक वा राजनीतिक प्रयोजनमा प्रयोग भइरहेको गुनासो आएपछि केन्द्रीय कार्यालयले निर्देशन जारी गरेको हो।
रेडक्रसले आफ्ना सम्पत्ति मानवीय सेवा, राहत, उद्धार, स्वास्थ्य सेवा, विपद् व्यवस्थापन र रक्तसञ्चारजस्ता स्वीकृत काममा मात्र प्रयोग गर्न आग्रह गरेको छ।
संस्थाको नियम र आचारसंहिता विपरीत सवारी वा एम्बुलेन्स प्रयोग गरेको पाइए सम्बन्धित व्यक्ति कारबाहीको भागीदार हुने रेडक्रसले जनाएको छ।
