भीमदत्त कञ्चनपुर, ४ साउन । कञ्चनपुरको शुक्लाफाँटा राष्ट्रिय निकुञ्जभित्र च्याउ टिप्न जाने क्रममा सम्पर्कविहीन भएका सबै महिलाहरू सकुशल फेला परेका छन्। नेपाली सेनासहितको संयुक्त सुरक्षा टोलीको सक्रिय खोजी तथा उद्धार अभियानपछि उनीहरू परिवारको सम्पर्कमा आएका हुन्।
गत आइतबारदेखि हराइरहेका भीमदत्त नगरपालिका–१९ बागफाँटा र दशरथ टोलका महिलाहरूको खोजीका लागि नेपाली सेना, नेपाल प्रहरी, सशस्त्र प्रहरी, नगर प्रहरी तथा निकुञ्ज प्रशासनले संयुक्त रूपमा व्यापक सर्च अपरेसन चलाएका थिए।
शुक्लाफाँटा राष्ट्रिय निकुञ्ज सुरक्षार्थ खटिएको रणसिंह दल गणका गणपति प्रमुख सेनानी प्रकाश घिमिरेका अनुसार सबै संयन्त्र परिचालन गरेर निकुञ्जभित्र खोजी कार्यलाई तीव्र बनाइएपछि महिलाहरू सुरक्षित फेला परेका हुन्।
यसअघि, आइतबार साँझदेखि निकुञ्जभित्रै हराइरहेका बेल्डाडी गाउँपालिका–२ का अन्य तीन जना महिलालाई रणसिंह दल गणका सहसेनानी सुमन जिसी नेतृत्वको टोलीले सोमबार बिहानै सकुशल उद्धार गरी परिवारको जिम्मा लगाएको थियो।
निकुञ्जभित्र च्याउ टिप्न गएका तीन वटा छुट्टाछुट्टै महिला समूह जङ्गलमा अलमलिएर सम्पर्कविहीन भएका थिए। घना जङ्गल, जङ्गली जनावरको उच्च जोखिम र कठिन भौगोलिक अवस्थाका बाबजुद सुरक्षा टोलीले रातभर अपरेसन जारी राखेको थियो।
निकुञ्ज प्रशासनले अनुमति बिना संरक्षित क्षेत्रभित्र प्रवेश नगर्न र वन्यजन्तुको जोखिम हुने भएकाले जङ्गली क्षेत्रमा जथाभाबी नजान सर्वसाधारणलाई कडा आग्रह गरेको छ।
