इटहरी । इटहरीस्थित यातायात व्यवस्था कार्यालयले स्मार्ट लाइसेन्स (चालक अनुमति–पत्र) वितरण प्रक्रियालाई झण्झटिलो बनाएको सेवाग्राहीहरूले बताएका छन् ।
यातायात व्यवस्था कार्यालयले स्मार्ट लाइसेन्स छिटो वितरण गर्नुपर्नेमा झन् ढिलो र झन्झटिलो बनाएको सेवाग्राहीले आरोप लगाएका छन् ।
सरकारले सबैतिर स्मार्ट लाइसेन्स वितरण गर्ने नीति बनाएको छ । तर, वितरण व्यवस्थापन सहज हुन नसक्दा सेवाग्राहीले समयमै चालक अनुमति–पत्र पाउन सकेका छैनन् ।
सवारी चालक अनुमति–पत्र स्मार्ट लाइसेन्स वितरण कक्ष अगाडिको ठूलो भीडमा भेटिएका सङ्खुवासभा मादीका केदारप्रसाद दाहालले भने, ‘मैले ०७६ माघमा नवीकरण गरेँ । ६ महिनासम्ममा लाइसेन्स आउँछ भन्थे । तर, २ वर्ष कटिसक्यो अझै लाइसेन्स पाउन सकिएको छैन ।’
उनले सङ्खुवासभाबाट आएरपनि हात खाली फर्कनु परेको तीतो अनुभव सुनाए । उनीजस्तै स्मार्ट लाइसेन्स पाउनका लागि यातायात व्यवस्था कार्यालयमा धाउनेहरू हजारौं छन् ।
यसबारे जिज्ञासा राख्दा यातायात व्यवस्था कार्यालयको स्मार्ट लाइसेन्स वितरणकक्षकी कर्मचारी तिलोत्तमा दाहालले भनिन्, ‘प्रायःजसो नाम, थर र ठेगानामा त्रुटी भएमा स्मार्ट कार्ड ढिलो आउने वा नआउने हुनसक्छ । विभागबाट नै थोरैमात्र कार्ड पठाउने गरेकाले पनि वितरणमा समस्या भएको हो ।’
अर्को पटक नवीकरण गर्ने बेलासम्म पनि स्मार्ट लाइसेन्स नपाउँदा सेवाग्राहीहरूले व्यहोर्नुपरेको सास्तीलाई यातायात व्यवस्था विभागले ध्यान दिन नसकेको गुनासो सेवाग्राहीले गर्दै आएका छन् ।
