जनकपुर,१७ साउन । गृहमन्त्री सुधन गुरुङ र संयुक्त हिन्दू मोर्चा तथा हिन्दू सम्राट सेना नेपालका प्रतिनिधिबीच जनकपुरस्थित यात्री निवासमा भएको दोस्रो चरणको वार्ता सकारात्मक रूपमा सम्पन्न भएको छ।
शनिबार राति भएको सहमतिमा देखिएका अस्पष्टता हटाउन आइतबार गृहमन्त्रीको उपस्थितिमा करिब डेढ घण्टा छलफल भएको थियो। छलफलपछि मोर्चाले आफ्ना पूर्वघोषित सबै विरोध तथा आन्दोलनका कार्यक्रम फिर्ता लिने घोषणा गरेको हो।
वार्ताका क्रममा मोर्चाले यसअघि राखेको १३ बुँदे मागमा थप ६ बुँदा समेट्दै कुल १९ बुँदे मागपत्र गृहमन्त्री गुरुङसमक्ष बुझाएको छ। सरकारले ती मागलाई सकारात्मक रूपमा लिँदै आवश्यक अध्ययन र कार्यान्वयनका लागि उपयुक्त समयमा समिति गठन गर्ने समझदारी भएको जनाइएको छ।
वार्तामा आन्दोलनका क्रममा पक्राउ परेका प्रदर्शनकारीलाई विनाशर्त रिहा गर्ने, उनीहरूमाथि मुद्दा नचलाउने तथा प्रदर्शनका क्रममा गोली चलाउने सुरक्षाकर्मीमाथि निष्पक्ष छानबिन गरी दोषी देखिए कानुनअनुसार कारबाही प्रक्रिया अघि बढाउने सहमति भएको छ।
धनुषाका प्रमुख जिल्ला अधिकारी प्रेमप्रसाद लुइँटेलका अनुसार अघिल्लो दिन सार्वजनिक भएको सहमतिको पत्र र हस्ताक्षरसम्बन्धी देखिएको अन्योल वार्ताबाट स्पष्ट भएको हो। गृहमन्त्रीले सञ्चारमाध्यममा आएका भ्रमबारे स्पष्ट पारेपछि मोर्चाका प्रतिनिधिहरू सन्तुष्ट भएका थिए।
हिन्दू सम्राट सेनाका केन्द्रीय उपाध्यक्ष कृष्ण सनातनीले सरकारबाट अब प्रदर्शनकारीमाथि गोली नचलाउने प्रतिबद्धता आएको र माग सम्बोधन गर्ने आश्वासन पाएपछि आन्दोलन स्थगित गरिएको बताएका छन्।
गृहमन्त्री गुरुङले पनि शान्ति, सुरक्षा र संवादको बाटो रोजेकोमा मोर्चालाई धन्यवाद दिँदै प्राप्त मागपत्रहरू सरकारका तर्फबाट ग्रहण गरिएको जानकारी दिएका छन्।
