भोजपुर : साल्पासिलिछो गाउँपालिका-२ जिमिगाउँका एकै परिवारका मानसिक रोगी दुई युवालाई लामो समयदेखि खोरमा थुनेर राखिएको छ। कमजोर आर्थिक अवस्थाका उपचार गर्न नसकेपछि परिवारले उनीहरूलाई काठको खोर बनाएर थुनेर राखेको हो।
उपचार गर्न नसकेपछि कान्छा छोरा ३३ वर्षीय डेगराज चौहान सात वर्षदेखि र जेठो छोरा ३७ वर्षीय डम्बर चौहानलाई दुई वर्षदेखि खोरमा थुरेर राख्नु परेको बुवा छत्रबहादुर चौहानले बताए। उनीहरूलाई खोरमा थुनेर नराखे परिवारका सदस्य तथा बटुवालाई नै कुटपिट गर्ने, अपशब्द बोल्ने, बाहिर कुद्ने, मानिसलाई चिथोर्ने, बरबराउनेलगायत क्रियाकलाप गर्ने उनले बताए।
‘आर्थिक अवस्था कमजोर छ। उपचार गर्ने पैसा छैन। कमाएर ल्याउने छोराहरूमा मानसिक रोग छ‚’ छत्रबहादुरले भने‚ ‘उनीहरूलाई सम्हालेर राख्न नै समस्या छ। खोरमा राखेन भने अनेक उप्रदो गर्छन्। आफ्ना छोरा हुन् माया त लाग्छ नि। तर‚ पनि पशु झैं खोरमा राख्नु परेको छ।’
उनीहरूलाई घरको सिकुवामा काठको खोर बनाएर राखिएको छ। उपचारको अभावमा छोराहरुले कष्टकर जीवन बिताइरहेकाले छत्रबहादुरले सहयोगको याचना गरेका छन्।
‘गरिब परिवार छ। चरम आर्थिक अभाव छ‚’ उनले भने‚ ‘उपचारका लागि कोसिस गर्दागर्दै केही भएको सम्पत्ति पनि सकियो। अब उनीहरूलाई खोरमा थुनेर टुलुटुलु हेर्नुको विकल्प छैन। सरोकारवालाले उपचारका लागि सहयोग गरी दिन्छन् कि भन्ने आशा छ।’
ती दाजुभाइलाई ललितपुरको पाटनमा रहेको मानसिक अस्पतालमा उपचार गराए पनि रकम अभाव भएपछि घरमै ल्याएर राखेको छत्रबहादुरले बताए। उनीहरूलाई नियमित औषधि खुवाउन नसकेको कारण झनै समस्या भएको उनको भनाइ छ।
छत्रबहादुरका तीन छोरामध्ये जेठो र कान्छालाई मानसिक समस्या छ। माइलो छोरा छुट्टिएर बसेका छन्। मानसिक समस्या भएका कारण व्यक्तिगत सरसफाइलगायतका कुरामा अरूको सहायता आवश्यक पर्ने भए पनि आफ्ना छोराहरूलाई सरकारले अपाङ्गता परिचयपत्रसमेत नदिएको छत्रबहादुरको गुनासो छ।
गाउँपालिका उपाध्यक्ष धनमाया राईले आर्थिक अभावमा उपचारबाट बञ्चित भएका चौहान दाजुभाइको पहिचान भएकाले अब चाँडै अपाङ्गता परिचयपत्र बनाएर सरकारले प्रदान गर्दै आएको सामाजिक सुरक्षा भत्ता उपलब्ध गराउने बताइन्। ‘उहाँहरूको अवस्थाबारे हामीलाई जानकारी भएपछि आवश्यक सहयोगमा जुटेका छौँ‚’ उनले भनिन्‚ ‘उनीहरूलाई राज्यबाट पाउने सुविधा दिलाउन प्रक्रिया अघि बढाएका छौँ।’
