विराटनगर,२ भदौ । कोशी प्रदेश सरकार स्थापना भएको ९ वर्ष पूरा हुँदा कार्यपालिकामा महिलाको उपस्थिति निकै कमजोर देखिएको छ। संविधानले राज्यका हरेक अङ्गमा ३३ प्रतिशत महिला सहभागिता सुनिश्चित गरे पनि कोशीमा यो अभ्यास केवल १६.६६ प्रतिशतमा खुम्चिएको छ।प्रदेश सरकारको ९ वर्षे अवधिमा ६ जना मुख्यमन्त्री र ७२ जना मन्त्री फेरिएका छन्। तर, यो अवधिमा मन्त्रिपरिषद्मा पुग्ने महिलाको सङ्ख्या जम्मा १३ जना (१६.६६ प्रतिशत) मात्र छ। त्यसमा पनि पूर्ण मन्त्रालयको जिम्मेवारी (क्याबिनेट मन्त्री) पाउने महिला जम्मा ५ जना छन् भने बाँकी ८ जनालाई राज्यमन्त्रीमै सीमित गरिएको छ।
पहिलो कार्यकालः ३ जना मुख्यमन्त्री र ३० जना मन्त्री बन्दा महिलाको सङ्ख्या ५ मात्र थियो। तीमध्ये उषाकला राई र खिनु लङ्वा लिम्बूले मात्र मन्त्रीको जिम्मेवारी पाउनु भएको थियो भने जसमाया गजमेर, कला घले र विष्णु तुम्बाहाम्फे राज्यमन्त्री बन्नु भएको थियो ।दोस्रो कार्यकालः हालसम्म ४२ जना मन्त्री बन्दा ९ जना महिला सरकारमा पुगेका छन्। जसमध्ये निर्मला लिम्बू, खिनु लङ्वा लिम्बू र गीता तिम्सिनाले क्याबिनेट मन्त्रीको जिम्मेवारी पाउनु भएको छ। इन्दिरा थापा, सुनिताकुमारी गुरुङ, सिर्जना राई, बन्दना झाँगर, शोभा चेम्जोङ र सपना दर्जी राज्यमन्त्रीमा सीमित हुनु भएको छ।
पछिल्लो पटक भएको मन्त्रिपरिषद् विस्तारमा भने नेपाली कम्युनिस्ट पार्टीले आफ्नो भागमा परेका पदहरूमा ३ जना महिलालाई समेटेको छ; जसमा २ जना मन्त्री र १ जना राज्यमन्त्री छन्।मुख्यमन्त्री हिक्मतकुमार कार्कीले पछिल्लो विस्तारमा महिला प्रतिनिधित्व बढेको भन्दै खुसी व्यक्त गरे तापनि समग्र ९ वर्षको तथ्याङ्कले समावेशिताको संवैधानिक मर्म अझै व्यवहारमा लागू हुन नसकेको देखाउँछ।
