काठमान्डौं,१ भदौ । झापाको बिर्तामोड–३ सैनिकमोडस्थित मेची आँखा अस्पतालनजिकै रहेको एक होटलबाट लागूऔषध ब्राउन सुगरसहित एकजना भारतीय नागरिक पक्राउ परेका छन्।
विशेष सूचनाका आधारमा प्रहरी चौकी बिर्ताबजारबाट प्रहरी सहायक निरीक्षक नरबहादुर गौतमको कमाण्डमा खटिएको प्रहरी टोलीले हिजो दिउँसो १ः४५ बजे उमानन्द होटल एण्ड लजबाट भारत बिहारको सुपौल जिल्ला भीमपुर बालुवाबजारका मोहमद तोहिदलाई पक्राउ गरेको हो।
प्रहरीका अनुसार उनको साथबाट ५ ग्राम ५५० मिलिग्राम ब्राउन सुगर बरामद भएको छ।
यस्तै, मोरङको सुन्दरहरैचा नगरपालिका–१ का ४९ वर्षीय सुन्दरलाल चौधरी पनि गाँजासहित पक्राउ परेका छन्। इलाका प्रहरी कार्यालय बेलबारी र इलाका प्रहरी कार्यालय हरैचाबाट खटिएको प्रहरी टोलीले चौधरीको घरबाट ३ किलो ७६० ग्राम गाँजा र नगद २ लाख ७१ हजार रुपैयाँ बरामद गरेको हो।
पक्राउ परेका दुवै जनामाथि लागूऔषधसम्बन्धी थप अनुसन्धान भइरहेको प्रहरीले जनाएको छ।
