काठमाडौं ,भदौ १० । दूरसञ्चार सेवा प्रदायक एनसेलले रसुवा जिल्लामा बुधबार बिहान आएको भीषण बाढीबाट प्रभावित क्षेत्रमा तीन दिनका लागि भ्वाइस तथा डेटा सेवा निःशुल्क उपलब्ध गराउने भएको छ ।कम्पनीका अनुसार प्रभावित क्षेत्रका सर्वसाधारणलाई तीन दिनको समयावधि रहेको १०० वटा एसएमएससमेत निःशुल्क उपलब्ध गराइनेछ । बाढीका कारण परिवार, आफन्त तथा उद्धार टोलीसँग सम्पर्क गर्न कठिनाइ भइरहेको अवस्थामा निःशुल्क सञ्चार सेवाले प्रभावितलाई सहज रूपमा सम्पर्कमा रहन मद्दत पुग्ने अपेक्षा गरिएको छ ।
आपत्कालीन अवस्थामा सञ्चार सेवा निरन्तर हुनु महत्वपूर्ण भएकाले प्रभावित क्षेत्रमा सेवा सहज बनाउन यस्तो व्यवस्था गरिएको एनसेलले जनाएको छ । यसबाट बाढी प्रभावित सर्वसाधारणले परिवार तथा उद्धारमा खटिएका टोलीसँग आवश्यक सूचना आदानप्रदान गर्न सक्ने कम्पनीको भनाइ छ ।एनसेलले विपद्का समयमा यसअघि पनि सञ्चार सेवा तथा अन्य सहयोगमार्फत खोज, उद्धार र राहतका कार्यमा सहयोग गर्दै आएको जनाएको छ । कम्पनीका अनुसार पछिल्लो पहल पनि बाढी प्रभावित क्षेत्रमा आपत्कालीन सञ्चार सेवा सुनिश्चित गर्ने उद्देश्यले गरिएको हो ।
