नुवाकोट,२० भदौ । नुवाकोटको बेत्रावतीमा त्रिशूलीको विनाशकारी बाढीले घर पुरिएको ११ औँ दिनमा एक महिलाको जीवितै उद्धार गरिएको छ। उद्धार हुनेमा बिदुर नगरपालिका–१० की चन्द्रिका श्रेष्ठ रहनु भएको छ ।यो चमत्कारिक घटनाले स्थानीय बासिन्दा र उद्धारमा खटिएका सुरक्षाकर्मीहरूलाई अचम्मित र खुसी तुल्याएको छ। बेत्रावतीस्थित आनन्द श्रेष्ठको घरमा पुरिनु भएकी उहाँलाई शनिबार प्रहरीले उद्धार गरेको हो।
नुवाकोटका प्रहरी उपरीक्षक एसपी विपिन रेग्मीका अनुसार पहिरोले आधा पुरिएको अवस्थामा रहेको घरभित्रबाट मानिसको आवाज आएको जानकारी पाएलगत्तै प्रहरी टोली घटनास्थल पुगेको थियो। प्रहरीले उत्खनन गर्दा श्रेष्ठलाई जीवितै फेला पारेको हो।११ दिनसम्म पहिरोभित्र पुरिएर पनि जीवितै रहन सफल ती महिलालाई तत्काल उपचारका लागि स्वास्थ्य संस्था लगिएको छ। भदौ १० को भीषण बाढीका कारण सो क्षेत्रमा ठुलो क्षति पुगेको थियो।
