झापा मेचीनगर ,११ असोज । झापाको मेचीनगर–१० धुलावारी माइती भएकी हेमा मण्डलको हत्या गरेको आरोपमा उनका श्रीमान् विप्लव कुमारलाई भारतीय प्रहरीले पक्राउ गरेको छ ।
भारतको नक्सलवारीमा श्रीमान्सँगै भाडाको कोठामा बस्दै आएकी हेमाको शव केही दिनअघि कुहिएको अवस्थामा कोठाभित्र फेला परेको थियो ।
हेमाको मृत्यु स्वाभाविक नभई हत्या भएको भन्दै माइती पक्षले भारतीय प्रहरीमा उजुरी दिएपछि प्रहरीले घटनाबारे अनुसन्धान अघि बढाएको थियो ।
अनुसन्धानका क्रममा प्रहरीले हेमाका पति विप्लव कुमारलाई पक्राउ गरेको हो ।
पक्राउ परेका विप्लवलाई भारतीय प्रहरीले शनिबार सिलिगुडी अदालतमा पेश गरेको छ ।
माइती पक्षका अनुसार करिब दुई वर्षअघि विप्लव कुमार कामका लागि धुलावारी आएका बेला हेमासँग चिनजान भएको थियो ।
त्यसपछि विप्लवले हेमालाई फकाएर भारत लगेको माइती पक्षको भनाइ छ ।
केही समयअघि विप्लव कुमार ‘काम गर्न जान्छु’ भन्दै एक साताका लागि घरबाहिर गएका थिए ।
सोही अवधिमा हेमाको हत्या भएको हुनसक्ने आशंका माइती पक्षले गरेको छ ।
भारतीय प्रहरीले घटनाबारे थप अनुसन्धान भइरहेको जनाएको छ ।
