झापा, १७ कात्तिक । झापाका छुट्टाछुट्टै दुई स्थानबाट प्रहरीले ब्राउन सुगरसहित तीन जनालाई पक्राउ गरेको छ। लागूऔषध कारोबारमा संलग्न रहेको आरोपमा उनीहरूलाई नियन्त्रणमा लिइएको हो।लागूऔषध नियन्त्रण ब्युरो र इलाका प्रहरी कार्यालय काँकरभिट्टाको संयुक्त टोलीले गएराति ८ : ३० बजे मेचीनगर–६ स्थित मेची पुलबाट मेचीनगर–१० का २९ वर्षीय मेहबुब आलम मियाँलाई पक्राउ गरेको हो। भारतबाट नेपालतर्फ आउँदै गर्दा शंका लागेर जाँच गर्दा उनको साथबाट प्लाष्टिकबाहेक ११ ग्राम ४७० मिलिग्राम (प्लाष्टिकसहित १४ ग्राम २९) मिलिग्राम ब्राउन सुगर बरामद भएको छ। उनलाई इलाका प्रहरी कार्यालय काँकरभिट्टामा राखेर अनुसन्धान भइरहेको जिल्ला प्रहरी कार्यालय झापाले जनाएको छ।
त्यस्तै, शिवसताक्षी नगरपालिका–६ हवल्दार चोकबाट हिजो दिउँसो थप दुईजना पक्राउ परेका छन्। ब्राउन सुगरको कारोबार भइरहेको विशेष सूचनाका आधारमा इलाका प्रहरी कार्यालय झिलझिलेको टोली सूर्य पौडेलको काठको घरमा पुग्दा भाग्न खोजेका शिवसताक्षी–६ का १९ वर्षीय गंगाराम मर्डी र शिवसताक्षी–५ का ४० वर्षीय राजेन्द्र गणेशलाई नियन्त्रणमा लिएको हो।उक्त घरको दोस्रो तलास्थित टिनको दराजभित्र लुकाइएको अवस्थामा प्लाष्टिकबाहेक २ ग्राम ५५० मिलिग्राम प्लाष्टिकसहित ३ ग्राम १८ मिलिग्राम ब्राउन सुगर फेला परेको प्रहरीले जनाएको छ। कारोबारमा संलग्न रहेको आशंका गरिएका घरधनी ४१ वर्षीय सूर्य पौडेल भने फरार रहेकाले उनको खोजी कार्य तीव्र पारिएको छ।
