झापा, १७ कात्तिक । झापाका विभिन्न स्थानमा भएका पाँच छुट्टाछुट्टै दुई पाङ्ग्रे सवारी दुर्घटनामा परी ११ जना घाइते भएका छन्।हिजो मँगलबार साँझ ६ : १५ बजे शिवसताक्षी नगरपालिका–८, दुर्गा चोकस्थित झिलझिले–शिवगंज सडकखण्डमा प्रदेश १–०१–०१४ प ४३९ नम्बरको मोटरसाइकलले पैदलयात्रीलाई ठक्कर दिँदा तीन जना घाइते भएका छन्। घाइते हुनेमा पैदलयात्री ५३ वर्षीय गोकुल थापा (अवस्था गम्भीर), चालक १९ वर्षीया साधना चिमरिया र पछाडि सवार ३३ वर्षीय विशाल बुढाथोकी रहनु भएको छ। उहाँहरूको बीएण्डसी अस्पताल, बिर्तामोडमा उपचार भइरहेको छ।
यसैगरी, हिजो दिउँसो १ बजे गौरादह–२, विद्युत् प्राधिकरण अगाडि प्र १–०१–०१३ प ९९८६ नम्बरको मोटरसाइकलको ठक्करबाट पैदलयात्री ६० वर्षीया निरा अधिकारी घाइते हुनु भएको छ। टाउको र हातखुट्टामा चोट लागेको उहाँको गौरादह नगर अस्पतालमा उपचार भइरहेको छ भने चालक सरिला विक उपचारमा संलग्न हुनुन्छ। मोटरसाइकल इलाका प्रहरी कार्यालय गौरादहको नियन्त्रणमा छ।त्यस्तै, हिजो बिहान ९ः३५ बजे बुद्धशान्ति गाउँपालिका–३, कालीखोला नजिक चारआली–बुधबारे सडकखण्डमा मे ०९ प ३४१४ नम्बरको स्कुटी अनियन्त्रित भई दुर्घटना हुँदा चालक ३४ वर्षीय सन्तोष खवास घाइते हुनु भएको छ। उहाँको भगीरथ अस्पताल, बुधबारेमा उपचार भइरहेको छ।
उता, बिहान १० : ४५ बजे कमल गाउँपालिका–६, दहिचोकस्थित भित्री सडकमा बा २१ च ४७४९ नम्बरको कार र को ३० प २३७६ नम्बरको मोटरसाइकल एकापसमा ठोक्किँदा मोटरसाइकल चालक १८ वर्षीय अजित रसाइली घाइते हुनु भएको छ। दुवै खुट्टा र छातीमा चोट लागेको उहाँको लाइफलाइन अस्पताल, दमकमा उपचार भइरहेको छ। दुवै सवारी साधन इलाका प्रहरी कार्यालय दमकले नियन्त्रणमा लिएको छ।
यसैबीच, बिहान ११ः १५ बजे मेचीनगर–११, सृजनशील टोलमा प्रदेश १–०१–०१५ प ४४५९ नम्बरको मोटरसाइकल र प्रदेश १–०२–०४९ प २४८९ नम्बरको स्कुटी एकआपसमा ठोक्किँदा चार जना घाइते भएका छन्। घाइते हुनेमा मोटरसाइकल चालक ५८ वर्षीय बृहस्पति पाण्डे, पछाडि सवार ६३ वर्षीय भवानी तिमल्सिना तथा स्कुटी चालक ६३ वर्षीय केदार खतिवडा र पछाडि सवार ६१ वर्षीया सावित्रा खतिवडा रहनु भएको छ। उहाँहरूको बीएण्डसी अस्पताल, बिर्तामोडमा उपचार भइरहेको छ भने प्रहरी चौकी चारआलीले सवारी साधन नियन्त्रणमा लिएको छ।
