काठमाडौं,२६ कार्तीक । मकवानपुरको भीमफेदी गाउँपालिका–६ चिसापानीगढीमा भएको ईभी गाडी दुर्घटनामा घाइते भएका ६ जनाको हेटौँडा अस्पतालमा उपचार भइरहेको छ । दुर्घटनामा मृत्यु भएका १० जनामध्ये चार जनाको शव जिल्ला अस्पतालमा ल्याइसकिएको छ ।डिएसपी माधवकुमार काफ्लेले नेपाल न्यूज बैंकसँगको कुराकानीमा दुर्घटनामा १० जनाको मृत्यु भएको र उद्धार कार्य जारी रहेको जानकारी दिनु भयो ।उहाँले भन्नु भयो, ‘अन्दाजी बिहान पौने ६ बजे भीमफेदी गाउँपालिकामा प्रदेश ०३–००१ ज ०८८० नम्बरको ईभी गाडी दुर्घटना हुँदा करिब ५०० मिटर तल खसेको छ । अहिलेसम्म ६ जना घाइतेलाई हेटौँडा अस्पतालमा ल्याएर उपचार गराउने काम भइरहेको छ भने १० जनाको मृत्यु भइसकेको छ । जसमध्ये चार जनाको शव जिल्ला अस्पतालमा ल्याइसकेका छौँ ।’
दुर्घटनास्थल भिरालो र जंगल क्षेत्रमा रहेकाले शव निकाल्न कठिनाइ भइरहेको उहाँले बताँउनु भयो । सुरक्षाकर्मीले घटनास्थलबाट शव निकाल्ने र उद्धार गर्ने काम जारी राखेको उहाँको भनाइ छ ।उहाँका अनुसार उद्धार कार्यमा नेपाल प्रहरीका २७ जना, सशस्त्र प्रहरीका १० जना र नेपाली सेनाका १० जना खटिएका छन् । त्यसबाहेक नेपाल प्रहरीको गणबाट थप १५ जना परिचालन गरिएको छ भने अन्य सुरक्षाकर्मीसमेत उद्धारमा जुटेका छन् ।काफ्लेले घाइते र मृतकको सनाखत गर्ने काम भइरहेको पनि जानकारी दिनु भयो ।
दुर्घटनाको कारणबारे भने यकिन भइसकेको छैन । चालकको निद्रा नपुगेका कारण दुर्घटना भएको हुन सक्ने आशंका उहाँले व्यक्त गर्नु भएको छ ।उहाँले भन्नु भयो, ‘अहिले दुर्घटना यही कारणले भएको हो भन्ने कुरा भन्न सकिएको छैन । तर, ईभी गाडीका चालकले हिजो बेलुका गाडी चलाएर काठमाडौं गएको र आज बिहानै १–२ बजेतिर त्यहाँबाट सवारीसाधन चलाउनुले चालकको निद्रा नपुगेको हो कि भन्ने मेरो अनुमान छ । अहिले यही कारणले हो भन्ने कुरा अनुसन्धान गर्छौं ।’
