इटहरी/
आईतबार देखी प्रदेश १ का १४ वटै जिल्लामा ट्राफिक सप्ताह २०७८ सुरु भएको छ । साताव्यापी रूपमा आयोजना हुने उक्त कार्यक्रममा सडक सुरक्षाका विविध चेतनामूलक कार्यक्रम आयोजना गरिने बताइएको छ ।
साताव्यापी रपमा आयोजना हुने कार्यक्रममा सडक सुरक्षाका विविध चेतनामूलक कार्यक्रम आयोजना गरिने जिल्ला ट्राफिक प्रहरी कार्यालय झापाका प्रमुख चापागाईँले जानकारी दिनुभएको छ । चापागाईँले दुर्घटना बढी जसो चालकको लापरबाहीका कारण हुने भए पनि सडक सुशासनसँग सम्बद्ध सबै पक्षले स्वामित्व ग्रहण गर्नु पर्ने बताउनुभएको छ ।
यसैबिच, प्रदेश १ मा पछिल्ला बर्षहरुमा सडक दुर्घटना र दुर्घटनामा परि मृत्यु हुनेहरुको संख्या बढ्दे गएको एक तथ्याङ्कले देखाएको छ । १ नम्बर प्रदेश ट्राफिक प्रहरी कार्यालयले उपलब्ध गराएको तथ्याङ्क अनुसार आर्थिक वर्ष २०७५/७६ मा ३१३, २०७६/७७ मा ३३२, २०७७/७८ मा ४४४ जनाको दुर्घटनाबाट मृत्यु भएको छ ।
ट्राफिक प्रहरीको यो तथ्याङ्कलाई हेर्दा हरेक वर्ष सडक दुर्घटनामा परि अकालमै ज्यान गुमाउनेहरूको ग्राफ उच्च हुँदै गएको देखिन्छ । यो भयावह स्थितिलाई न्यूनीकरण गर्न सबैको दायित्व भएकाले ट्राफिक सप्ताह अन्तर्गत एक सातासम्म विविध कार्यक्रम सञ्चालन गरी सवारी नियम पालना गराउनेतर्फ ट्राफिक प्रहरी सचेत रहेको बताइएको छ ।
दुर्घटनाको जोखिम र मृत्युलाई छल्न नसकिने भएकाले सवारी चालक, बटुवा सबैले ट्राफिक नियम पालना गरेमा दुर्घटनालाई केही हदसम्म न्यूनीकरण गर्न सकिने १ नम्बर प्रदेश ट्राफिक प्रहरी कार्यालयको भनाइ छ ।
