काठमाडौं, माघ २७
सत्तारुढ दल नेकपा एमालेका महासचिव शङ्कर पोखरेलले साइबर अपराध रोक्न ल्याइएको सामाजिक सञ्जाल सञ्चालन, प्रयोग तथा नियमन गर्न बनेको विधेयकबारे भ्रम फिँजाउने काम भइरहेको सामाजिक सञ्जालमार्फत नै बताउनु भएको छ ।
आज उहाँँले सामाजिक सञ्जाल अन्तर्गत आफ्न्ो फेसबुकमार्फत सामाजिक सञ्जालको नियमन तथा दुरुपयोग र साइबर अपराध रोक्न विधेयक ल्याइएको स्पष्ट पार्नुभयो । उहाँले प्रेस तथा अभिव्यक्ति स्वतन्त्रता रोक्न खोजियो भन्दै भ्रम छर्ने काम भएको भन्दै असन्तुष्टि व्यक्त गर्नुभयो । उहाँले सामाजिक सञ्जालबाट आपराधिक घटना बढेको, चरित्र हत्या भएको लगायतका विषयमा नियमन आवश्यक रहेको उल्लेख गर्दै सरकारले अभिव्यक्ति स्वतन्त्रतामा अङ्कुश लगाउने कुनै काम नगर्ने स्पष्ट पार्नुभयो ।
विगतमा आफैँले विधेयक मस्यौदा गर्न लगाएका र त्यसका बारेमा आफ्नो मत बाहिर ल्याएका दलहरूले नै यसको विरोध गर्नु अनैतिक कार्य भएको भन्दै महासचिव पोखरेलले यस्ता कुराप्रति नागरिकहरू सचेत हुनुपर्ने धारणा राख्नु भयो ।
महासचिव पोखरेलले विधेयकमा केही अस्पष्टता र सुधार गर्नु पर्ने देखिए संसद्ले सुधार गर्न सक्ने जनाउँदै विरोधै गर्नुको कुनै अर्थ नरहेको जनाउनु भयो ।
