जमिन नभएर किन चिन्ता ? घरमाथि नै गर्न सकिन्छ खेती

दमक, चैत ७
तपाईंको सहरमा घर मात्र छ, साजसब्जी लगाउने र फूलबारी बनाउने जमिन छैन भनेर चिन्तामा हुनुहुन्छ ? यदि त्यस्तो हो भनें दमक नगरपालिकाले तपाईंको घरको कौशी अर्थात छतमा खेती गर्नकालागि प्रोत्साहित गरिरहेको छ । तपाईं पनि त्यसमा सहभागि भएर जमिनको विकल्पमा घरैमाथि खेती गर्न सक्नु हुनेछ । जसले वातावरण समेत हरियाली बनाउन मद्धत गर्दछ ।

कौशी खेतीको अवधारण यतिबेला मात्र अघि आएको भनें होइन । दमक नगरपालिकाका सहरीकरण भएका वडा वडामा यसखाले खेतीकालागि तालिम प्रदान गरेर घरवालाको सागसब्जीको दैनिक आवश्यकतालाई परिपूर्ति गराउने काम सञ्चालन भइरहेको छ । यस अन्तर्गत सबैभन्दा बढी बजारीकरण भएको वडा नम्बर ६ ले बिहीबारबाट कौशी खेती सम्बन्धी ३ दिने तालिम प्रारम्भ गरेको छ ।

तालिम उद्घाटनका क्रममा बोल्दै वडा नम्बर ६ का अध्यक्ष टेकबहादुर थापाले कौशी खेती गरेर विषादीरहित सागसब्जी उत्पादन गरेर स्वस्थ र आत्मनिर्भर बन्न सकिने उत्प्रेरणा दिनुभयो ।

तालिममा प्रशिक्षकका रुपमा रहनु भएका रुपक बुढाथोकीले मौसम अनुसारका साजसब्जी लगाउनुपर्ने कुरालाई ध्यान दिँदै गर्मीयामको यो समयमा लगाउने सागसब्जीका बारेमा जानकारी गराउनु भयो ।

वडाको १ लाख रुपैयाँको बजेटमा २५ महिला र ५ पुरुष सहभागि तालिम समापनसँगैट मल बीउ बीजन तथा खेतीमा आवश्यक सामग्री समेत वितरण गरिने छ ।