विराटनगर । विराटनगर–१८ का ३१ वर्षीय सुरेश यादवले वैदेशिक रोजगारको क्रममा आफू ठगिएको बताएका छन् । आकर्षक तलब र सेवा सुविधाको लोभमा एजेन्टबाट उनी ठगिन पुगेका हुन् ।
एक वर्षअगाडि मासिक १५ सय दिरहाम हुने भएपछि उनले दुबई जानको लागि १ लाख ५० हजार रुपैयाँ काठमाडौंका एजेन्ट विप्लव लामालाई बुझाए । रकम बुझाएपछि उनी सुपर मार्केटमा कामको लागि दुबई एक वर्षअगाडि पुगेका थिए । दुबई पुगे पनि उनलाई लिन कम्पनी नआएको सुरेशले बताए । ‘दुबईमा पुगेपछि एउटा कोठामा लगेर राख्यो । कम्पनीको मान्छे भन्दै एक जना आएर पासपोर्ट पनि लिएर गयो ।
त्यसपछि त्यो मान्छे आएन’ उनले भने, ‘सात महिनासम्म बन्द कोठामा थुनिएपछि विभिन्न सङ्घ–संस्थाले पहल गरी नेपाली दुतावासको सहयोगमा स्वदेश फर्किएँ ।’ सुन्दर सपना बोकेर रोजगारीका लागि गएका यादव उल्टै ऋणको बोझमा परेका छन् । परिवारले १ लाख भन्दा बढी पठाएपछि मात्र आफू स्वदेश फर्कन पाएको उनले बताए ।
वैदेशिक रोजगारीमा ठगिएकाहरूलाई निःशुल्क कानूनी सहायता प्रदान गर्दै आएको पिपुल फोरमले विराटनगरमा सोमबार आयोजना गरेको कार्यक्रममा रोजगारीको क्रममा ठगिएको गुनासो सुनाउने सुरेशमात्र एक्ला युवा होइनन् । मोरङको जहदाका ३२ वर्षीय सुरेन्द्र यादवको पीडा पनि सुरेशको जस्तै छ । उनी पनि रोजगारीको लागि दुबई सुरेशसँगै गएका थिए । उनी पनि बन्द कोठामा सात महिनासम्म बसेपछि स्वदेश फर्किएका छन् ।
अहिले दुवै युवाले वैदेशिक रोजगारको लागि आफूहरू ठगिएको भन्दै जिल्ला प्रशासन कार्यालय मोरङमा जाहेरी दिएका छन् । ‘विदेश पठाए पनि रोजगारमा नलगाएपछि पैसा फिर्ता माग्दा एजेन्टले विभिन्न धाकधम्की दिए, भौतिक, सामाजिक रूपमा पनि असुरक्षित भयौं’ सरेन्द्रले भने, ‘वैदेशिक रोजगार विभाग, जिल्ला प्रशासन कार्यालय मोरङमा धाउँदा पनि अझै न्याय पाएका छैनौं ।’ वैदेशिक रोजगारको क्रममा ठगिएका युवाहरूले विभिन्न निकायमा जाँदा पनि न्याय पाउन ढिलो भएको उनीहरूको गुनासो छ ।
मोरङमा वैदेशिक रोजगारीमा जानेहरू ठगिने क्रम बढेको छ । एकै व्यक्तिबाट धेरै जना ठगिएका उजुरी आउने क्रम बढेको मोरङका प्रमुख जिल्ला अधिकारी काशीराज दाहालले जानकारी दिए । रोजगारको क्रममा ठगिएको उजुरी आए वैदेशिक रोजगार ऐन, २०६४ ले दिएको अधिकार प्रयोग गरेर कारबाहीको दायरामा ल्याउने प्रमुख जिल्ला अधिकारी दाहालले बताए ।
कार्यक्रममा पिपुल फोरमका सल्लाहकार तथा अधिवक्ता सोमप्रसाद लुइँटेलले कोभिड–१९ का कारण रोजगारी गुमाई वा तलब सुविधा नपाई स्वदेश फर्केका आप्रवासी कामदारलाई वैदेशिक रोजगार कल्याणकारी कोषबाट क्षतिपूर्ति प्रदान गरिदिनुपर्ने बताए । पिपुल फोरमले वैदेशिक रोजगार पीडितलाई २०७८ असार मसान्तसम्म २३ हजार ७ सय ४२ जनालाई निःशुल्क कानूनी सहायता प्रदान गरेको छ ।
निःशुल्क कानूनी सहायतामार्फत् कामदार र उनीहरूका परिवारले ९५ करोड ३२ लाख ४५ हजार ४ सय ४४ रुपैयाँ क्षतिपूर्ति पाएको पिपुल फोरमले जनाएको छ । कोभिड–१९ पछि वैदेशिक रोजगारको क्रममा अलपत्र परेका विभिन्न ८ वटा खाडी मुलकबाट ५ लाख ७२ हजार ५ सय ७१ जना स्वदेश फर्किएको कोभिड–१९ सङ्कट व्यवस्थापन केन्द्रको अभिलेखमा देखिन्छ । सबैभन्दा बढी युएईबाट अलपत्र भएर स्वदेश फर्किएका बढी छन् । युएईबाट १ लाख ६० हजार ४ सय ७० जना स्वदेश फर्किएका छन् ।
