दमक,२२ पुस । दैनिक जीवनका अभावबीच पढाइलाई निरन्तरता दिइरहेका विपन्न परिवारका बालबालिकाका लागि एक प्लेट पौष्टिक खाना कति अर्थपूर्ण हुन्छ भन्ने दृश्य आज दमकमा देखियो।
एकदिन भएपनि विद्यालय आउने बालबालिकाको मुहारमा खुसी ल्याउने र उनीहरुलाई पढाइप्रति थप उत्साहित बनाउने उद्देश्यका साथ लायन्स क्लब अफ दमक माउन्ट एभरेष्ट र लिओ दमकको संयुक्त आयोजनामा दमकस्थित पृथ्वी माध्यमिक विद्यालयमा फुड फिडिङ कार्यक्रम सम्पन्न भएको छ।
कार्यक्रम अन्तर्गत कक्षा १ देखि ५ सम्म अध्ययनरत विद्यार्थीहरुलाई पौष्टिक खाना वितरण गरिएको थियो। खाना पाउँदा विद्यार्थीहरुको अनुहारमा देखिएको उत्साह र खुसीले कार्यक्रमको उद्देश्य आफैं बोलेको जस्तो देखिन्थ्यो।
कार्यक्रममा दमक नगरपालिका वडा नम्बर ७ का वडाध्यक्ष भिम पौडेल प्रमुख अतिथिका रूपमा उपस्थित रहनुभएको थियो भने लायन्स क्लब अफ दमक माउन्ट एभरेष्टका अध्यक्ष सतप्रकाश साहको अध्यक्षतामा कार्यक्रम सम्पन्न भएको हो।
सधैं खुवाउन नसकिएपनि एकदिन भएपनि बालबालिकाले आत्मीयता र साथको अनुभूति गरुन्, विद्यालय आउन प्रेरणा मिलोस् भन्ने सोचका साथ यस्तो कार्यक्रम आयोजना गरिएको लायन्स क्लबले जनाएको छ। यस्ता गतिविधिले विद्यार्थीमा समाज र सेवाभावप्रति सकारात्मक सोच विकास हुने लायन्स क्लबका डिस्ट्रीक गर्भनर बबरजंग थापाको भनाइ छ।
कार्यक्रमप्रति आभार व्यक्त गर्दै पृथ्वी माध्यमिक विद्यालयका प्रधानाध्यापक विष्णु बहादुर राईले लायन्स क्लबसँग सहकार्य गरेर आगामी दिनमा पनि विभिन्न सामाजिक तथा शैक्षिक कार्यक्रम सञ्चालन गर्ने प्रतिबद्धता जनाउनुभएको छ। उहाँका अनुसार यस्ता कार्यक्रमले विद्यार्थीलाई विद्यालय आउन थप प्रोत्साहन मिल्नेछ।
विद्यार्थीको पोषण र मनोबल दुवैलाई लक्षित गर्दै लायन्स क्लब अफ दमक माउन्ट एभरेष्टले भविष्यमा पनि यस्तै खाले सामाजिक उत्तरदायित्वका कार्यक्रम निरन्तर सञ्चालन गर्ने जनाएको छ।
