झापा । झापा गोल्डकपअन्तर्गत आज भारत सिक्किमको आरपी एफसीविरुद्ध हुने अन्तिम क्वार्टरफाइनल खेलमा घरेलु टोली झापा–११ फुटबल क्लब भिड्दै छ ।
झापाले अधिकांश राष्ट्रिय खेलाडी मैदानमा उतार्ने तयारी गरेको छ । झापा–११ फुटबल क्लबका मुख्य प्रशिक्षक सन्तोष गुरुङका अनुसार घरेलु टोलीको कप्तानी विशाल राईले सम्हल्ने भएका छन् ।
उनी पछिल्लो समय ‘ए’ डिभिजन लिग विजेता मच्छिन्द्र क्लबबाट व्यावसायिक फुटबल खेल्दै आएका छन् ।
झापाबाट देवेन्द्र तामाङ, विश्वास श्रेष्ठ, विमल घर्तीमगर, आन्द्रेस मियाँ, सत्यम् श्रेष्ठ, रुमेश बर्तौला, मनीष थापा, रामजीलगायत राष्ट्रिय खेलाडी मैदानमा उत्रिने प्रशिक्षक गुरुङले जानकारी दिए ।
त्यस्तै, झापाको पोस्ट दीप कार्कीको जिम्मामा परेको छ । उनी राष्ट्रिय टोलीका सदस्य हुन् । झापा टिममा अरू ‘सी’ डिभिजन लिग खेलेका युवा खेलाडी छन् ।
आजको खेल अत्यन्तै रोमाञ्चक र प्रतिस्पर्धात्मक हुने आयोजकले जनाएको छ । विगतको संस्करणमा जस्तो यसपटक झापा– ११ को सेट टिम नभए पनि सशक्त टिम निर्माण भएको गुरुङले बताए ।लगातार चारवटा संस्करणको फाइलनलिष्ट झापाविरुद्ध पाहुना टोली सिक्किमको खेल कस्तो हुनेछ अपराहन्न साढे २ बजे डोमलाल राजवंशी रंगशालामा देखिनेछ।
