महोत्तरीमा हावाहुरीका कारण गोठ भत्किँदा च्यापिएर एक महिलाको मृत्यु

जनकपुरधाम,२६ वैशाख । महोत्तरीमा हावाहुरीका कारण गोठ भत्किँदा च्यापिएर एक महिलाको मृत्यु भएको छ। जिल्लाको पिपरा गाउँपालिका–६ मुसहरी टोल बस्ने ५० वर्षीया सुनिता सदाको मृत्यु भएको हो। उनी स्थानीय सुन्देश्वर सदाकी श्रीमती हुन्।

प्रहरीका अनुसार शुक्रबार साँझ करिब साढे ५ बजेतिर आएको तीव्र हावाहुरीका कारण स्थानीय झगरु मुखियाको गाई गोठमा ओत लाग्न गएको समयमा गोठ भत्किँदा उनी च्यापिएकी थिइन्। गोठले थिचिँदा सुनिताको घटनास्थलमै मृत्यु भएको महोत्तरीका प्रहरी प्रवक्ता शैलेन्द्र भट्टले जानकारी दिनु भयो।