झापा,६ जेठ। झापा जिल्लामा गत बैशाख महिनामा मात्रै २२७ वटा विभिन्न आपराधिक घटनाका मुद्दा दर्ता भएका छ्न । ति मध्ये आर्थिक अपराधका मात्रै ५० वटा मुद्दा छ्न ।
जिल्ला प्रहरी कार्यालय झापाका अनुसार वैशाख महिनाभर झापामा विभिन्न प्रकृतिका कुल २ सय २७ वटा मुद्दा दर्ता भएका छ्न ।
प्रहरीका अनुसार दर्ता भएका मुद्दामध्ये १ सय २८ सामान्य, ७८ गम्भीर तथा २० जघन्य प्रकृतिका रहेका छन् । यस अवधिमा प्रहरीले २ सय ९ जना प्रतिवादी पक्राउ गरेको जनाएको छ भने ६८ जना फरार रहेका छन् ।
महिला, बालबालिका तथा ज्येष्ठ नागरिक विरुद्धका कसुर अन्तर्गत १२ वटा मुद्दा दर्ता भएका छन् । जसमा महिलासम्बन्धी ४, बालबालिकासम्बन्धी ८ रहेका छ्न ।
यस्तै आर्थिक अपराधतर्फ ५० वटा मुद्दा दर्ता भएका छन् । जसमा लागूऔषध सम्बन्धी ७, बैंकिङ कसुर ४२ र अपराधिक लाभ सम्बन्धी १ मुद्दा रहेको प्रहरीको तथ्यांकमा उल्लेख छ ।
प्रहरीले वैशाख महिनामा विभिन्न मुद्दामा फरार रहेका ४५ जना प्रतिवादी पक्राउ गरेको जनाएको छ । पक्राउ परेकामाथि १ सय ६ वर्ष ३ महिना १९ दिन कैद सजाय तथा रु. २६ लाख १७ हजार ५ सय ७१ रुपैयाँ जरिवाना असुल गर्न बाँकी रहेको प्रहरीले जनाएको छ ।
फरार प्रतिवादी पक्राउ टोलीले लागूऔषध, वैदेशिक रोजगार, ठगी, संगठित अपराध र बहुविवाह सम्बन्धी मुद्दाका मुख्य प्रतिवादीहरूलाई समेत पक्राउ गरेको जिल्ला प्रहरी कार्यालय झापाले जनाएको छ ।
