दमक। २९ जेष्ठ । नेपाल–भारत सीमा व्यवस्थापन तथा सीमासम्बन्धी विषयमा नेपाल र भारतका उच्च अधिकारीहरूको सहभागितामा झापाको बिर्तामोडमा द्विपक्षीय फिल्ड सर्भे बैठक सम्पन्न भएको छ । आज बिहान करिब १० बजेर ४५ मिनेटमा बिर्तामोड नगरपालिका–३ स्थित किङ्सबेरी होटलको सभाहलमा आयोजित बैठक नेपाल–भारत सीमा सम्बन्धी द्विपक्षीय फिल्ड कार्य अन्तर्गत सम्पन्न भएको हो ।
बैठकमा भारतको बिहार राज्य अन्तर्गत किशनगञ्ज जिल्लाका जिल्ला अधिकारी विशाल राज, भारतीय सीमा सुरक्षा बल एसएसबीका अधिकारीहरू तथा अन्य सुरक्षा निकायका प्रतिनिधिहरू सहभागी थिए । नेपालतर्फबाट ताप्लेजुङ, पाँचथर, इलाम र झापाका प्रमुख जिल्ला अधिकारी तथा प्रतिनिधिहरू, नेपाल प्रहरी र सशस्त्र प्रहरीका जिल्ला प्रमुखहरू, डिभिजन वन कार्यालयका प्रमुखहरू लगायतको सहभागिता रहेको थियो ।
करिब ५० देखि ६० जना उच्च सरकारी अधिकारी तथा सुरक्षा निकायका प्रतिनिधिहरूको उपस्थितिमा सम्पन्न बैठकमा नेपाल–भारत सीमाक्षेत्रको व्यवस्थापन, सीमा स्तम्भको अवस्था, सीमाक्षेत्रमा देखिएका चुनौती तथा समन्वयका विषयमा छलफल भएको जनाइएको छ । दुवै देशका सम्बन्धित निकायबीच सीमासम्बन्धी विषयमा आपसी सहकार्य, सूचना आदानप्रदान र समन्वयलाई थप प्रभावकारी बनाउने उद्देश्यले बैठक आयोजना गरिएको बताइएको छ ।
