काठमाडौं,१ असार । नेपाली कांग्रेसकी सांसद रेनुका काउचाले पश्चिम नवलपरासीको सुस्ता क्षेत्रमा भारतीय सीमा सुरक्षा बल (एसएसबी) को आवागमन र गतिविधिप्रति सरकारको ध्यानाकर्षण गराउनु भएको छ ।
सोमबार बसेको प्रतिनिधिसभाको बैठकमा बोल्दै उहाँले सुस्ताका सीमावासी नेपालीलाई राज्य आफ्नो साथमा रहेको अनुभूति गराउन आवश्यक रहेको बताउनु भयो।
उहाँले प्रधानमन्त्रीले केही समयअघि संसदमा दिएको ‘नेपालले पनि सीमा मिचेको छ’भन्ने अभिव्यक्तिपछि भारतीय एसएसबीका अधिकारीहरू पटक–पटक सुस्ता क्षेत्रमा आउन थालेको दाबी गर्नु भयो ।
‘पश्चिम नवलरासी सुस्ताका सीमा रक्षक नेपालीलाई हामीसँग सरकार छ भन्ने अनुभूति दिनुपर्छ । संयोग पनि भयो, प्रधानमन्त्रीले नेपालले पनि सीमा मिचेका छ भनेर अभिव्यक्ति दिएपछि घरीघरी भारतीय एसएसबी सुस्तामा आइरहेका छन्। सायद प्रधानमन्त्रीज्यूले भनेको मिचिएको सीमा खोज्न आएका होलान्,’ उहाँले भन्नु भयो।
सांसद काउचाले जेठ १७ गतेपछि पुनः जेठ २९ गते पनि भारतीय एसएसबीका अधिकारीहरू सुस्तामा आएको उल्लेख गर्दै स्थानीय बासिन्दाले साहसका साथ उनीहरूलाई फर्काएको बताउनु भयो । यद्यपि, पुनः आउने चेतावनी दिएर फर्किएको भन्दै उहाँले सरकारको तयारीबारे प्रश्न उठाउनु भयो।
उहाँले भन्न्ु भयो,‘फेरि आउने भन्दै गएका एसएसबीलाई सुस्तामा पस्नै नदिन सरकारले के गरिरहेको छ रु सरकारले संसदलाई जवाफ दिनुपर्छ ।’
