बिर्तामोड , १४ साउन | झापाको बिर्तामोड नगरपालिका–५ पुरानो भद्रपुर रोडमा आज बिहान भएको आगलागीमा तीन वटा घर पूर्ण रूपमा जलेर नष्ट भएका छन्।
जिल्ला प्रहरी कार्यालय झापाका अनुसार बिहान करिब ४ बजेर १५ मिनेटमा गणेश पोख्रेलको काठको दुईतले घरबाट आगलागी सुरु भएको थियो। घटनाको जानकारी प्राप्त हुनासाथ इलाका प्रहरी कार्यालय अनारमनी र शनिश्चरे बेस क्याम्पबाट प्रहरी टोली परिचालन गरिएको थियो।
बिर्तामोड, भद्रपुर र मेचीनगर नगरपालिकाका दमकल तथा स्थानीयवासीको सहयोगमा आगो बिहान ५ बजेर ४० मिनेटमा पूर्ण रूपमा नियन्त्रणमा ल्याइएको प्रहरीले जनाएको छ।
प्रारम्भिक अनुसन्धानका आधारमा विद्युत् सर्ट भएर आगलागी भएको हुन सक्ने प्रहरीले जनाएको छ।
आगलागीबाट गणेश पोख्रेल, तारा आर्याल र सुन्दर राजवंशीका घर पूर्ण रूपमा जलेर नष्ट भएका छन्। यस्तै भरत पोख्रेल र सारदा राजवंशीका घरमा आंशिक क्षति पुगेको छ भने दीपेन्द्रकुमार वलीको घरको दोस्रो तलाको झ्यालमा सामान्य क्षति भएको छ।
घटनामा कुनै मानवीय वा चौपाया क्षति नभएको प्रहरीले जनाएको छ। आगलागीबाट भएको आर्थिक क्षतिको विवरण भने अझै खुल्न बाँकी रहेको छ।
