काठमाडौं ,२ भदौ। जनक परियारको संयोजकत्वमा सामाजिक न्याय, सुशासन र नागरिक अधिकारका लागि ‘राष्ट्रिय जागरण अभियान’ घोषणा भएको छ ।
मंगलबार राजधानीको संवाद डबलीमा कार्यक्रमको आयोजना गरी देश राजनीतिक अनिर्णयको बन्दी बनेकोले त्यसको निकासका लागि नयाँ अभियान घोषणा गर्नुपरेको संयोजक परियारले बताउनु भयो ।
संयोजक परियारले अभियानले देशमा विद्यमान विभेद, भ्रष्टाचार, अन्याय, शोषण तथा नागरिकका आधारभूत अधिकारसँग सम्बन्धित समस्याविरुद्ध संगठित रूपमा आवाज उठाउने जनाउनु भयो ।
अभियानले नागरिकका मौलिक हक तथा अधिकारको संरक्षण, सामाजिक तथा आर्थिक विभेदको अन्त्य र राज्यका सेवा–सुविधामा समान पहुँच सुनिश्चित गर्नुपर्नेमा जोड दिएको उहाँले जनाउनु भयो ।
वरिष्ठ अधिवक्ता दिनेश त्रिपाठीले नयाँ भनिएकाहरु पनि पुरानै दलहरु भन्दा फरक नभएको आरोप लगाउनु भयो । भ्रष्टाचार र सुशासनको नारा दिएर सत्तामा पुगेकाहरुले पनि थप भ्रष्टाचार र कुशासन चलाएका छन । त्यसको खबरादारीका लािग अभियानले भूमिका खेल्ने विश्वास रहेको बताउनु भयो ।
डा।निर्मल विश्वकर्माले शिक्षा, स्वास्थ्य, रोजगारी, आवास तथा सामाजिक सुरक्षा जस्ता जनताका मौलिक अधिकारहरुमाथि नै वर्तमान सरकारले प्रहार गरेको आरोप लगाए । विश्वकर्माले सरकारलाई खबरादारी गर्न अभियानको मुख्य लक्ष्य हुनुपर्ने सुझाउनु भयो ।
सामाजिक अभियान्ता गणेश गोतामेले श्रमिकका अधिकार संरक्षण गर्ने, महिला, दलित, आदिवासी जनजाति, मधेसी, मुस्लिमलगायत पछाडि पारिएका समुदायको अधिकार सुनिश्चित गर्न अभियानले भूमिका खेल्नुपर्ने धारणा राख्नु भयो ।
अभियान्ता रामसुन्दर सुनामले भ्रष्टाचार नियन्त्रण, पारदर्शिता, जवाफदेहिता र कानुनी शासनको प्रभावकारी कार्यान्वयनका लागि दबाब सिर्जना गर्नुपर्ने धारणा राख्नु भयो ।
अभियान्ता राजन छिनालले डिजिटल तथा सामाजिक सञ्जालमार्फत नागरिक जागरण विस्तार गर्ने, विभिन्न सामाजिक अभियान सञ्चालन गर्ने तथा अधिकार र कर्तव्यबारे जनचेतना अभिवृद्धि गरिने जनाउनु भयो ।
