काठमान्डौ , ५ भदौ ।राष्ट्रिय किताबखाना (निजामती) का अनुसार पछिल्लो चार महिनामा ३७६ जना निजामती कर्मचारीले सेवाबाट राजीनामा दिएका छन्।
गत वैशाखदेखि साउन मसान्तसम्मको अवधिमा राजीनामा दिनेमा उच्च तहका अधिकारीको संख्या उल्लेख्य छ।
यस अवधिमा ३ जना सचिव, ७० जना सहसचिव र ६५ जना उपसचिवले सेवा छाडेका छन्। बाँकी राजीनामा दिनेमा अधिकृत तथा सहायकस्तरका कर्मचारी छन्।
सरकारले ल्याउने तयारी गरेको निजामती सेवा ऐनमा ५५ वर्षमा अनिवार्य अवकाश र ३० वर्षे सेवाअवधि तोक्ने तयारी गरेको चर्चा चलिरहेका बेला त्यसबाट बच्न उच्च तहका कर्मचारीले राजीनामा दिएको हुनसक्ने सरकारी अधिकारीहरूको अनुमान छ।
किताबखानाका कर्मचारीका अनुसार यति छोटो अवधिमा यति ठूलो संख्यामा, विशेषगरी सहसचिव र उपसचिव तहका कर्मचारीले सेवा छाडेको यो असामान्य घटना हो। यसअघि राजीनामा दिएर सेवा छाड्नेभन्दा अनिवार्य अवकाशमा जाने कर्मचारीको संख्या बढी हुने गरेकोमा अहिले भने राजीनामा दिने कर्मचारीको संख्या बढेको किताबखानाले जनाएको छ।(तस्बिर एआइ)
