उदयपुर,८ भदौ । उदयपुरको बेलका नगरपालिका–५ जहडामा स्कुल बस र अटो रिक्सा आपसमा ठोक्किँदा दुई जनाको मृत्यु भएको छ भने तीन जना घाइते भएका छन्।सुपाडेबाट लालबजारतर्फ जाँदै गरेको को.प्र.०५–००१ ह ०६१३ नम्बरको अटो र विपरीत दिशाबाट आउँदै गरेको सफल आदर्श इङ्लिस बोर्डिङ स्कुलको को १ ख ३५१६ नम्बरको बस सोमबार बिहान पौने १० बजे आपसमा ठोक्किएका हुन्।
दुर्घटनामा अटोमा सवार पाँचै जना घाइते भएका थिए। उनीहरूलाई तत्काल उपचारका लागि धरानस्थित बीपी कोइराला स्वास्थ्य विज्ञान प्रतिष्ठान पु¥याइएकोमा उपचारका क्रममा दुई जना महिलाको मृत्यु भएको प्रहरीले जनाएको छ।मृत्यु हुनेमा बेलका–५ की ३४ वर्षीया मन्दिरा मगर र पहिचान नखुलेकी अन्दाजी ३०–३५ वर्षीया अर्की एक महिला रहेका छन्। चिकित्सकले मध्याह्न ११ः४५ बजे दुवैलाई मृत घोषणा गरेका थिए।
दुर्घटनामा घाइते भएका अटो चालक बेलका–५ का २८ वर्षीय इन्द्र थापा र सोही ठाउँका १८ वर्षीय रोशन मगरको अवस्था गम्भीर छ। यस्तै मोरङ विराटनगर–१२ का १९ वर्षीय अजित गुरुङको अवस्था मध्यम रहेको र उनीहरूको धरानमै उपचार भइरहेको छ।दुर्घटनापछि इलाका प्रहरी कार्यालय रामपुरठोक्सिलाले बस र चालक बेलका–५ का ३६ वर्षीय बिक्रम थापालाई नियन्त्रणमा लिएर घटनाको अनुसन्धान सुरु गरेको छ।
